Yunanıstanda yanğın törətmək ittihamı ilə 300-dən çox insan saxlanılıb

Yunanıstanda yanğın törətmək ittihamı ilə 300-dən çox insan saxlanılıb.

Ölkənin yanğınsöndürmə xidmətinin məlumatına görə, cari ildə Yunanıstanda analoji ittihamla ümumilikdə 302 nəfər saxlanılıb. Onlardan 31-i yanğını qəsdən törətməkdə, 271-i isə ehtiyatsızlıqdan yanğına səbəb olmaqda təqsirləndirilir.

Medianın məlumatına görə, oxşar hadisələr və güclü isti səbəbindən Yunanıstanda bir çox yanğın ocaqları ilə mübarizə aparılır. Onların məlumatına əsasən, ən ağır vəziyyət Afina yaxınlığındakı Salamin adasında yaranıb, orada 16 avqustda demək olar ki, eyni vaxtda iki yanğın baş verib. Alov yaşayış və turizm zonalarını sürətlə bürüyüb. İki nəfər həlak olub, bir neçə nəfər yaralanıb, 570-dən çox sakin və turist isə sahil zolağından qayıqlar və sahil mühafizə gəmiləri ilə təxliyə edilib.

Son günlərdə Krit, Skyros, Halkidiki və Attika bölgəsində də yanğınlar qeydə alınıb.

Avqustun 15-də Yunanıstan ölkədə yüksək meşə yanğını təhlükəsi səviyyəsi elan edib.