Yəməndə Səudiyyə Ərəbistanının rəhbərliyi ilə fəaliyyət göstərən koalisiyanın hava zərbələri nəticəsində Birləşmiş Ərəb Əmirliklərinin dəstəklədiyi 20 separatçı öldürülüb.

Hücum “Cənub Keçid Şurası” qüvvələrinin üzvlərinə iki hərbi bazada baş verib.

Yəmən separatçıları iki il ərzində Yəmənin cənubunda müstəqillik referendumunun keçirilməsini və şimaldan ayrılmasını istədiklərini bildirirlər.

Səudiyyə Ərəbistanı və beynəlxalq səviyyədə tanınan Yəmən hökuməti ötən ay Birləşmiş Ərəb Əmirliklərini Yəmənin cənubundakı Hədramevt və Əl-Mahra əyalətlərinin bir hissəsini ələ keçirmək cəhdində ittiham edib. Riyad tərəfləri xəbərdar edib ki, bu ərazilərdə “Cənub Keçid Şurası”nın artan mövcudluğunu öz milli təhlükəsizliyi üçün təhdid olaraq qiymətləndirir.

Birləşmiş Ərəb Əmirlikləri bu ittihamları rədd edib və Səudiyyə Ərəbistanının təhlükəsizliyinə sadiq olduğunu bildirib. Səudiyyə Ərəbistanının çağırışından sonra Birləşmiş Ərəb Əmirlikləri son qoşunlarının Yəməndən çıxdığını təsdiqləyib.