“Washington Post” – Ukraynanın 12,4 trilyon dollar dəyərində enerji yataqları, metallar və mineralları Rusiyanın nəzarəti altındadır

Ukraynanın 12,4 trilyon dollar dəyərində enerji yataqları, metallar və mineralları hazırda Rusiyanın nəzarəti altındadır . Bu barədə Amerikanın “Washington Post” nəşri məlumat yayır.

Nəşr, Rusiyanın hərbi təcavüzdən sonra kömür yataqlarının 63 faizindən başqa, Ukraynanın neft yataqlarının 11 faizi , təbii qaz yataqlarının 20 faizi , ölkənin metallarının 42 faizi , nadir və digər vacib mineral yataqlarının, litium da daxil olmaqla 33 faizi üzərində nəzarəti ələ keçirdiyinə dair məlumat dərc edir.

Bəzi yataqlara daxil olmaq çətindir və ya onların həyat qabiliyyətini qiymətləndirmək üçün kəşfiyyat tələb olunur. Bəziləri Moskvanın 2014-cü ildə Krımı ilhaq etməsi və ya Ukrayna hökumətinin şərqdə Rusiyanın dəstəklədiyi separatçılarla səkkiz illik müharibəsi zamanı zəbt edilib.

Nəşrin yazdığı məqalədə, Rusiyanın 41 kömür yatağı, 27 təbii qaz məntəqəsi, 14 propan məntəqəsi, doqquz neft yatağı, altı dəmir yatağı, iki titan yatağı, iki sirkonium yatağı, bir stronsium məntəqəsi, bir litium məntəqəsi, bir uran obyekti və bir qızıl yatağını və əvvəllər Ukrayna poladının istehsalında istifadə edilən mühüm əhəngdaşı karxanasını ələ keçirdiyi deyilir.

Ukrayna Geoloji Xidmətinin baş direktoru Roman Opimax bildirib ki, hökumət hələ də müharibənin onun mineral ehtiyatlarına təsirini qiymətləndirir. Lakin Ukraynanın xammalının nə qədər şərqdə və cənubda olduğunu nəzərə alarsaq, o, itirilmiş ehtiyatların dəyərinin müstəqil təhlildə hesablanmış ümumi məbləğdən çox olacağını ehtimal edir.