Prezident Volodimir Zelenski Ukrayna qüvvələrinin Donbassda cəbhənin bəzi bölmələrində irəliləyiş əldə etdiyini bildirib. Zelenski bu barədə gündəlik video müraciətində açıqlayıb.

Ukrayna Prezidentinin qeyd etdiyi kimi, o, hərbi komandanlıqla cəbhədəki vəziyyəti müzakirə edib. Döyüşlərin episentri hələ də Baxmut, Soledar və Kremenaidir.

Bununla yanaşı, Ukrayna lideri gələn il Ukraynanın hava hücumundan müdafiəsinin daha da güclənəcəyini bildirib. Zelenskinin qeyd etdiyi kimi, Ukraynanın hava hücumundan müdafiəsinin gücləndirilməsi bütün Avropa qitəsinin təhlükəsizliyinin təminatına çevriləcək.

“Donetsk və Luqansk rayonları, ən şiddətli döyüşlərin davam etdiyi Donbassımız kiliddir. Baxmut, Soledar, Kremenaia… mövqeləri tutmuşuq. Cəbhənin elə hissələri var ki, biz orada yavaş-yavaş irəliləyirik. Bunu mümkün edən bütün döyüşçülərimizə minnətdaram. Budur əsl qəhrəmanlar! Cənubda, sərhədimizdəki vəziyyəti, silahların tədarükü, hava hücumundan müdafiənin gücləndirilməsini müzakirə etdik. Bu il biz hava hücumundan müdafiə sistemimizi nəinki qoruyub saxlamışıq, hətta heç vaxt olmadığı qədər gücləndirmişik. Lakin, yeni ildə Ukraynanın hava hücumundan müdafiəsi daha da güclənəcək və effektiv olacaq. Ukraynanın hava hücumundan müdafiəsi Avropanın ən güclüsü ola bilər və bu, təkcə dövlətimiz üçün deyil bütün qitənin təhlükəsizliyinin təminatı olacaq”–deyə Volodimir Zelenski açıqlayıb.

Ukrayna Prezidenti yüksək rütbəli hərbçilərlə görüşdə enerji ilə bağlı vəziyyətin də müzakirə edildiyini bildirib.