Ukrayna prezidenti Volodimir Zelenski Rusiya prezidenti Vladimir Putinə görüş təklif edir.

Zelenski Putinin bəyanatlarına cavab verib və qeyd edib ki, müharibəni dayandırmaq və davamlı sülhü təmin etmək üçün ölkə liderləri səviyyəsində görüş lazımdır.

Volodimir Zelenskinin dedeiyinə görə, Ukrayna Amerika Birləşmiş Ştatlarının prezidenti Donald Trampın müharibəyə, bütün qətllərə son qoymaq və ləyaqətli, davamlı sülhə nail olmaq səylərini görür və dəstəkləyir.

Zelenski həmçinin bildirib ki, Ukrayna Rusiya Federasiyasında kimin qərar verdiyini və bu müharibəni kimin bitirməli olduğunu başa düşür.

“Biz Rusiyadan bəyanatlar eşidirik və əgər bu, onların müharibəni ləyaqətlə bitirməyə, həqiqətən də davamlı sülhün bərqərar olmasına ciddi hazır olduqlarının siqnalıdırsa və təkcə müharibəyə daha çox vaxt udmaq, sanksiyaları təxirə salmaq cəhdləri deyilsə, Ukrayna istənilən vaxt liderlər səviyyəsində görüşməyə hazır olduğunu bir daha təsdiqləyir. Ukrayna texniki səviyyədə bəyanatların və görüşlərin mübadiləsindən liderlər arasında danışıq səviyyəsinə keçməyi təklif edir. Amerika bunu təklif etdi, Ukrayna dəstəklədi. Rusiyanın hazırlığı lazımdır”, – deyə Volodimir Zelenski bildirib.