Rusiya üçün heç nə dəyişməyib, o, Ukraynada yaşayış yerlərinin terrorunu davam etdirir, – bu barədə Ukraynanın Prezidenti Volodimir Zelenski bildirib.

Zelenskinin Krivoy Roqa hücumla bağlı danışarkən qeyd etdiyinə görə, təhlükəsizliyin yeganə qarantiyası tərəfdaşlarla əldə olunan razılaşmaların yerinə yetirilməsidir.

“Dron dalğası Krivoy Roqu bombalayaraq mülki infrastrukturu hədəfə alıb. Raketlər də qeydə alınıb. Əslində, son həftələr ərzində Rusiyanın Ukraynaya zərbə endirmədiyi bircə gecə belə olmayıb. Hədəflərin əksəriyyəti infrastruktur obyektləridir.

Enerji sektorumuza qarşı sistemli terror. Buna görə də bütün hava hücumundan müdafiə sistemləri Ukrayna üçün həyati əhəmiyyət kəsb edir. Bizi gücləndirə biləcək hər bir qərar müharibənin sonunu yaxınlaşdırır. Əgər hər şey barədə, xüsusən də Vaşinqtonda razılığa gələ bilsək, təhlükəsizlik təmin olunacaq”, – deyə Zelenski bildirib.

Ukrayna mediasının yazdığına görə, gecə saatlarında rus qoşunları Krivoy Roqa genişmiqyaslı hücuma başlayıb. Şəhərin müdafiə şurasının sədri Aleksandr Vilkul ondan çox partlayış barədə bəyan edib.