Rusiya Federasiyasının gecə ərzində Ukraynaya həyata keçirdiyi kombinə edilmiş hücumların əsas hədəfi yenə enerji obyektləri olub, – bu barədə Ukrayna prezidenti Vladimir Zelenski bildirib.

Ukrayna prezidentinin dediyinə görə, Rusiyanın məqsədi milyonlarla ukraynalıya zərər verməkdir və Müqəddəs Nikoloz Günündə dinc şəhərləri bombalayır.

Zelenskinin sözlərinə görə, Rusiyanın mülki infrastrukturla bağlı həyata keçirdiyi hücumlardan sonra hazırda bir çox bölgədə yenidənqurma işləri aparılır.

Zelenskinin bildirdiyinə görə, Kiyev bölgəsində, biznes obyektlərinə və yaşayış binalarına zərbələr endirilib, həmçinin Dnepr, Çerniqov, Zaporojye, Odessa, Lvov, Volın və Nikolayev vilayətləri də zərər görüb. Ukrayna prezidentinin dediyinə görə, Rusiya ötən gecə Ukrayna istiqamətində 650-dən çox dron və 51 raket buraxıb. Ukraynanın səkkiz regionunda enerji obyektləri və Fastiv şəhərinin əsas dəmir yolu qovşağı bombardman edilib. Ukraynanın hava hücumundan müdafiə qüvvələri 615 hava hədəfini məhv edib və zərərsizləşdirib. Raketlərlə və 60 pilotsuz uçuş aparatından 29 yerə zərbələr endirilib.