Volodimir Zelenski – Ötən gecə bizim uzaqmənzilli vasitələrimiz işğalçıların hərbi logistikasına, neft sənayesinə və hava hücumundan müdafiə sistemlərinə zərbələr endirib

Ötən gecə bizim uzaqmənzilli vasitələrimiz işğalçıların hərbi logistikasına, neft sənayesinə və hava hücumundan müdafiə sistemlərinə zərbələr endirib, – bu barədə Ukrayna prezidenti sosial şəbəkədə yazır.

Volodimir Zelenski sözügedən zərbəni Rusiyanın Ukrayna xalqına qarşı həyata keçirdiyi “gəddar hücumlara ədalətli cavab” adlandırır.

Onun sözlərinə görə, zərbələr Krım körpüsünün hər iki tərəfində yerləşən obyektlərə endirilib.

“Ukrayna Təhlükəsizlik Xidmətinin, Pilotsuz Sistemlər Qüvvələrinin, Ukrayna Müdafiə Nazirliyinin Baş Kəşfiyyat İdarəsinin və Xüsusi Əməliyyat Qüvvələrinin döyüşçülərinə cəbhə xəttindən təxminən 300 kilometr məsafədə uğurla həyata keçirilən əməliyyata görə təşəkkür edirəm. Zərbələr Krım körpüsünün hər iki tərəfində yerləşən obyektlərə endirilib: Krasnodar diyarında neft nəqli üçün istifadə olunan dəniz logistika infrastrukturuna və müvəqqəti işğal altında olan Kerçdəki neft bazasına. Bundan əlavə, uğurlu zərbə nəticəsində logistika obyektləri, həmçinin “S-400” tipli hava hücumundan müdafiə sistemlərinin dörd radar stansiyası və iki “Pantsir” tipli sistem məhv edilib. Bütün döyüşçülərimizin dəqiqliyinə və peşəkarlığına görə minnətdaram. Rusiya yalnız güc dilini anlayır və bizim uzaqmənzilli vasitələrimiz sülh üçün çalışır” , – deyə Zelenski yazır.