Ukrayna Prezidenti Volodimir Zelenskinin bildirdiyinə görə, ABŞ prezidenti Donald Trampla söhbət zamanı Kiyevin imkanlarının gücləndirilməsi üzərində işləmək barədə razılığa gəliblər.

“Biz prezident Trampla razılaşdıq ki, hava hücumundan müdafiə imkanlarını gücləndirmək üçün komandalarımızın görüşü keçirilsin. Bizim üçün və ABŞ üçün zəruri olan birgə istehsal məsələlərini dərindən müzakirə etdik”, – Volodimir Zelenski videomüraciətində qeyd edib.

Bununla yanaşı, Zelenski Ukraynadakı mövcud vəziyyətdən də danışıb və qeyd edib ki, indi onların vəzifəsi qırıcı dronların istehsalını artırmaq və pilotları yaxşı hazırlamaqdır.

“500-dən çox Rusiya pilotsuz uçuş aparatı və raketi səbəbindən günə çətin başlanğıc oldu. Çətin idi, lakin biz onların əhəmiyyətli hissəsini vurduq. Təəssüf ki, bəziləri hədəfə çatdı. Qırıcı dronlar bu gün əhəmiyyətli nəticələr göstərdi. Onlarla “Şahed” qırıcısı məhv edildi”, – Ukrayna prezidenti bildirib.