Volodimir Zelenski Birləşmiş Krallığa səfər edib

Ukrayna prezidenti Volodimir Zelenski Birləşmiş Krallığa səfər edib və orada Baş nazir Endi Bernem ilə görüşür. Zelenski baş nazir qismində Endi Bernemin ev sahibliyi etdiyi ilk beynəlxalq liderdir.

Zelenski və Bernem Britaniyanın rəhbərliyi altında Ukrayna Silahlı Qüvvələrinin nümayəndələrinin təlim keçdiyi hərbi-dəniz bazasına baş çəkiblər.

Endi Bernem Ukraynaya dəstəyini bir daha təsdiqləyib.

“Biz Ukraynanın 100 faiz yanındayıq. Şəxsən mən sizin yanınızdayam, cənab prezident, və bu ölkənin Ukrayna qarşısında götürdüyü hər bir öhdəliyi tam şəkildə yerinə yetirəcəyəm. Millətinizi qorumaq üçün apardığınız mübarizədə sizə kömək etməyə davam edəcəyik. Ukrayna dronlarını qorumaq üçün sizi yeni, Britaniya istehsalı olan siqnalboğucu (elektron mübarizə) texnologiyası ilə təmin edəcəyik. Bu, onlara hədəflərə zərbələr endirməkdə və ukraynalıların həyatını xilas etməkdə kömək edəcək. Biz sizi tam və qeyd-şərtsiz atəşkəsdə dəstəkləyəcəyik. Ukrayna artıq bu müharibənin gedişatını dəyişib. Siz vəziyyəti Rusiya ilə münasibətdə öz xeyrinizə çevirirsiniz. Buna görə də biz atəşkəsə nail olmaq və Ukraynanın masa arxasında təmsil olunmalı, Avropanın isə güclü səsə sahib olmalı olduğu danışıqların bərpası üçün təzyiq göstərməyə davam edəcəyik. Bizə güvənə bilərsiniz“, – deyə Bernem bildirib.

Öz növbəsində Prezident Zelenski yeni Baş nazirə təşəkkür edib.

“Birləşmiş Krallıqla münasibətlərimiz hər zamankından daha möhkəmdir. Endiyə bu tərəfdaşlığa olan sadiqliyinə, müdafiə və təhlükəsizliyimizə göstərdiyi böyük diqqətə görə təşəkkür edirəm. Müdafiə və təhlükəsizlik sadəcə sözlərdən ibarət deyil. Ölkə müdafiə və təhlükəsizliyə investisiya qoyduqda, Portsmut kimi şəhərlərin yerli icmaları, limanları və gəmi tikintisi zavodları getdikcə daha da güclənir və mühüm əhəmiyyət kəsb edir”, – deyə Zelenski bildirib.