Ukrayna prezidenti Volodimir Zelenskinin bildirdiyinə görə, cari il Berlin və Kopenhagendə silah ixracı üçün ofislər açılacaq.

“Biz iki ixrac mərkəzi açırıq. Məsələ digər ölkələrlə birlikdə istehsal etdiyimiz silahlara aiddir. Bu, satıla biləcək silahdır və əldə olunan gəliri çatışmayan döyüş texnikasının daxili istehsalına xərcləyəcəyik. Ticarət nümayəndəliklərimizin açılacağı ilk iki şəhər Berlin və Kopenhagendir. Bütün bunlar cari il həyata keçiriləcək”, – Volodimir Zelenski jurnalistlərlə söhbətində qeyd edib.

Ukrayna Prezidenti bildirib ki, Avropa İttifaqı ölkələri ilə müqavilə məsələlərini onun müşaviri Aleksandr Kamışin müzakirə edəcək.

Bununla yanaşı, Volodimir Zelenskinin izahatına görə, eyni zamanda ABŞ-la iş aparılır. Zelenskinin dediyinə görə, Amerika komandası gələn həftə Ukraynaya gələcək.