Ukrayna prezidenti Volodimir Zelenski bildirir ki, bazar ertəsi Vaşinqtonda ABŞ prezidenti Donald Tramp ilə müharibənin başa çatdırılması ilə bağlı bütün detalları müzakirə edəcək. Bu barədə Zelenski sosial şəbəkədə yazıb.

Onun sözlərinə görə, Donald Tramp ilə uzun və əhəmiyyətli telefon danışığı olub. Zəng əvvəlcə ikitərəfli idi, daha sonra onlara Avropa liderləri də qoşulublar. Telefon danışığı ümumilikdə bir saat yarım davam edib, onun bir saatı isə Tramp və Zelenskinin ikitərəfli söhbətinə həsr olunub.

Zelenskinin dediyinə görə, Ukrayna prezident Trampın Ukrayna, ABŞ və Rusiya arasında üçtərəfli görüş təklifini dəstəkləyir.

“Ukrayna bir daha təsdiqləyir ki, sülhə nail olmaq üçün maksimum səylə işləməyə hazırdır. Prezident Tramp mənə Rusiya lideri ilə görüşü və onların danışıqlarının əsas mövzuları barədə məlumat verdi. ABŞ-ın gücünün vəziyyətin inkişafına təsiri olması vacibdir. Biz Prezident Trampın Ukrayna, ABŞ və Rusiya arasında üçtərəfli görüş təklifini dəstəkləyirik. Qətllərin və müharibənin dayandırılması ilə bağlı bütün detalları müzakirə etmək üçün bazar ertəsi Vaşinqtonda Prezident Trampla görüşəcəyəm. Dəvətə görə minnətdaram. Avropalıların bütün mərhələdə iştirak etməsi vacibdir ki, Amerika ilə birlikdə təhlükəsizliyin etibarlı təminatlarını təmin etsinlər. Biz, həmçinin, amerika tərəfindən Ukraynanın təhlükəsizliyinin təmin edilməsində iştirakla bağlı müsbət siqnalları da müzakirə etdik. Biz bütün tərəfdaşlarla mövqelərimizin koordinasiyasını davam etdiririk. Bizə yardım edən hər kəsə təşəkkürümü bildirirəm”, – Zelenski yazır.