Ukrayna Prezidenti Volodimir Zelenski bildirib ki, ABŞ ilə sərbəst ticarət müqaviləsinin mümkünlüyünü müzakirə edir.

Zelenskinin izah etdiyi kimi, bu saziş müharibədən sonra ölkə iqtisadiyyatını yenidən qurmaq üçün daha geniş planın bir hissəsi olmalıdır.

Zelenski bildirib ki, bu saziş ABŞ ilə ticarətdə sıfır rüsumları nəzərdə tutur və Ukraynanın müəyyən sənaye bölgələrinə şamil edilə bilər.

Onun dediyinə görə, bu, Kiyevə qonşu ölkələrlə müqayisədə “çox əhəmiyyətli üstünlük” verəcək və xarici investisiyaların və biznesin cəlb olunmasına kömək edəcək.

“Bu, iqtisadi təhlükəsizliyin əlavə təminatı ola bilər”, – deyə Ukrayna prezidenti bildirib və təklifin təfərrüatlarını birbaşa ABŞ prezidenti Donald Trampla müzakirə etməyi planlaşdırdığını qeyd edib.

Ukrayna prezidenti həmçinin Donald Trampla ABŞ-da və ya Davosda Dünya İqtisadi Forumu çərçivəsində görüş keçirəcəyini təsdiqləyib. Zelenskinin dediyinə görə, Ukrayna həmçinin ABŞ-ın mümkün atəşkəsdən sonra azad iqtisadi zona yaratmaq barədə ideyasını nəzərdən keçirəcək.

“Format çətin, lakin ədalətlidir”, – Zelenski qeyd edib.

Bununla yanaşı, Volodimir Zelenski bildirib ki, Ukrayna işğal olunmuş əraziləri heç vaxt Rusiyanın bir hissəsi kimi tanımayacaq.