Biz çalışmalıyıq ki, həll olunmamış problemlərin sayını azaltaq, düşmənimizin yəqin ki, öz məqsədləri var və biz onlardan da xəbərdarıq, – bu barədə ABŞ-a yola düşən Ukrayna prezidenti Volodimir Zelenski təyyarə göyərtəsində mediayla danışıb.

Zelenskinin qeyd etdiyi kimi, Ukrayna üçün aydın qırmızı xətlər mövcuddur və o, ABŞ-dan kompromis təkliflər gözləyir. Onun sözlərinə görə, əsas məsələ Prezident Trampın hansı təhlükəsizlik zəmanətlərini verməyə hazır olduğudur.

“Əsas məsələ prezident Trampın Ukraynaya hansı təhlükəsizlik zəmanətlərini verməyə hazır olmasıdır. Mən başa düşürəm ki, hüquqi cəhətdən məcburi təminat həm prezident Trampdan, həm də Konqresdən asılıdır. Biz komandaların müzakirələrini və ümumi baxışımız olduğunu qiymətləndiririk. Hərçənd, bu, ABŞ prezidentindən asılı olacaq: o, nəyi təmin etməyə hazırdır, nə zaman bunu etməyə hazır olacaq və nə qədər müddətə.

“Düşünürəm ki, görüşlərimiz onlara bir çox təfərrüatı daha yaxşı başa düşməyə kömək etdi: həm təhlükəsizlik zəmanətləri, həm də ruslarla razılaşmanın riskləri baxımından bizə hansı təminatların lazım olduğunu, çünki onlar bu gün işləyə bilər, amma sabah işləməyə bilər. Həmçinin bizim millətin necə olması haqqında”, – Zelenski qeyd edib.

Ukrayna prezidentinin dediyinə görə, referendum və ya seçkilər zamanı bütün ölkə ərazisində təhlükəsizlik təmin edilməlidir.

“Heç olmasa seçkilər və ya referendumlar zamanı bütün ölkədə təhlükəsiz səma və təhlükəsizlik təmin olunmalıdır. Referendum seçki kimi bir prosesdir, xalqın gedib seçim etmək imkanı var. Hər yerdə xalqın, silahlı qüvvələrimizin, mülki vətəndaşların, xaricdə olanların, hər yerdə müşahidəçilərin olması çox vacibdir.

“Avropanın dəstəyi indi bizim üçün həyati əhəmiyyət kəsb edir. Bizim hava müdafiə sistemlərimizdə çatışmazlıq var və aydın olur ki, onlar bunu bilirlər, bizdən ətraflı məlumat alıblar. Sistemlər və raket təchizatı üçün güclü dəstəyə ehtiyacımız var. Bizə raketlər lazımdır, çünki Rusiya hücumlarını daha çox dronlar və raketlərlə davam etdirir”, – Zelenski bildirib.