Kiyev Rusiya hücumları səbəbindən fəlakətin astanasındadır, – bu barədə Kiyev meri Vitali Kliçko “The Financial Times” qəzetinə müsahibəsində bildirib.

Onun dediyinə görə, son iki ay ərzində Ukrayna paytaxtı Rusiyanın intensiv hücumlarının əsas hədəfi olub, bu da mühüm infrastruktura əhəmiyyətli dərəcədə ziyan vurub.

“Ölkəmizin gələcəyi hələ də açıq qalır – müstəqil bir ölkə olaraq sağ qalacağıq, yoxsa yox”, – Vitali Kliçko bildirib.

Kiyev meri qeyd edir ki, Rusiyanın paytaxtın enerji sektoruna irimiqyaslı hücumlarından sonra avropalı tərəfdaşlar Ukraynaya elektrik generatorları və humanitar yardım göstəriblər.

İstilik və elektrik enerjisinin uzunmüddətli çatışmazlığı səbəbindən paytaxtda hazırda 1 500-dən çox təcili yardım məntəqəsi yerləşdirilib.

Eyni zamanda, Kiyev meri müsahibəsində dövlət başçısı Volodimir Zelenski ilə davam edən münaqişəsinin olduğunu etiraf etdi və onun sözlərinə görə, bu münaqişə müharibədən əvvəl başlayıb.

Kliçkonun sözlərinə görə, prezidentin paytaxtın qışa zəif hazırlığı ilə bağlı tənqidinə baxmayaraq, bütün təcili yardım xidmətləri sutkanın 24 saatı işləyir.

“Dövlət başçısının şikayətlərinə cavab olaraq Kliçko bildirib ki, bütün təcili yardım xidmətləri istilik və elektrik enerjisini bərpa etmək üçün 24 saat ərzində işləyir. Onun dediyinə görə, bəzən zədələnmiş obyektlərin təmirinə sıfırdan başlamaq lazımdır”, – deyə məqalədə deyilib.

Medianın yazdığına görə, Ukraynanın paytaxtı Kiyev Rusiyanın tammiqyaslı işğalından sonra ən sərt qışını yaşayır. Havanın temperaturu mənfi 20 dərəcədən aşağı düşüb və Kiyev qalın buz və qar təbəqəsi ilə örtülüb. Rusiya dronları və raketləri ölkənin infrastrukturuna zərər vurub, nəticədə onlarla yaşayış binasına elektrik enerjisi, istilik və su verilmir.