Ermənistanda “Tramp marşrutunun” açılması Gürcüstana heç bir təhlükə yaratmayacaq və heç bir itkiyə səbəb olmayacaq, əksinə, Gürcüstanın əhəmiyyəti daha da artacaq – bu barədə Ermənistanın Prezidenti Vahaqn Xaçaturian bildirib.

Xaçaturianın sözlərinə görə, layihə həyata keçirildiyi təqdirdə Ermənistan, Türkiyə, İran, Azərbaycan və hətta Rusiya üçün də yeni imkanlar açılacaq. Ermənistan Prezidenti qeyd edib ki, Tbilisidə görüşlər zamanı gürcü rəsmi şəxslərindən “Tramp marşrutu” ilə bağlı heç bir narahatlıq eşitməyib.

“Hər şey bizdən asılı olacaq: əgər həqiqətən də sülh içində yaşamaq istəyiriksə, əgər qonşularla problemləri dərinləşdirmək yerinə, həll etmək yolunu seçiriksə, uğur qazanacağıq. Lakin buna hazır olmasaq, o zaman problemlər yaranacaq və biz özümüzü əvvəllər mövcud olan mühitdə tapacağıq”, – Ermənistan prezidenti qeyd edib.

Xaçaturian həmçinin bildirib ki, Gürcüstan müxtəlif məsələlərdə, o cümlədən Ermənistan-Azərbaycan münasibətlərinin normallaşdırılmasında yardım göstərməyə hazır olduğunu ifadə edib.