Ukraynanın prezidenti Volodimir Zelenski Ukraynanın əraziləri məsələsini müzakirə etməyə hazırdır, lakin bu, yalnız Vladimir Putinlə görüşdə mümkündür. Bu barədə “NBC News”a müsahibəsində Ukraynanın xarici işlər nazirinin birinci müavini Sergey Kislitsa bildirib.

O həmçinin qeyd edib ki, prezident Zelenski həm Ukraynanın qüvvədə olan qanunvericiliyi, həm də ictimai rəy ilə rəhbərlik edir.

“Düşünürəm ki, prezident Zelenski bunu çox açıq şəkildə bəyan edir və o, həm Ukraynanın qüvvədə olan qanunvericiliyi, həm də ictimai rəy ilə rəhbərlik edir, cəmiyyət isə qəti şəkildə ərazilərimizi sülhə dəyişməyə qarşı çıxır. Bu mövqe Vaşinqtonda da açıq şəkildə ifadə olundu. Lakin ərazi məsələlərindən danışarkən, düşünürəm ki, prezident Zelenski aydın şəkildə bildirdi ki, prezident Putinlə oturmağa və müzakirə aparmağa hazırdır. Ərazi məsələsi ilə bağlı söhbətin başlanğıcı isə hazırkı təmas xəttidir”, – deyə ukraynalı diplomat bildirib.

Sülh danışıqları ilə bağlı Kislitsa bildirib ki, onun fikrincə, proses dayanmayıb və irəliləyir.

Bununla yanaşı, ukraynalı diplomat Rusiyaya təzyiqin vacibliyindən danışdı.

“Ruslar prezident Trampın təklif etdiyi sülh yolunda irəliləməkdən imtina etdiklərinə görə ağrı hiss etməlidirlər”, – deyə Kislitsa qeyd edib.