Ukrayna nümayəndə heyəti Stiv Uitkof və Cared Kuşnerlə görüşmək üçün ABŞ-a gəlib. Bu barədə Ukrayna mediası məlumat yayır.

Onların məlumatına görə, Ukrayna nümayəndə heyətinin Donald Trampın xüsusi nümayəndələri ilə görüşü bu gün, 21 martda Mayamidə keçiriləcək.

Medianın məlumatına görə, Ukrayna nümayəndə heyətinə Milli Təhlükəsizlik və Müdafiə Şurasının katibi Rustem Umerov, Prezident Administrasiyasının rəhbəri Kirill Budanov, Prezident Administrasiyası rəhbərinin birinci müavini Sergey Kislitsia və “Xalqın Xidmətçisi” parlament fraksiyasının rəhbəri Davit Araxamia daxildir.

Bundan əvvəl isə Ukrayna prezidenti Volodimir Zelenski Amerika tərəfi ilə planlaşdırılan görüşdə müzakirə olunacaq əsas mövzuları açıqlayıb.

Onun sözlərinə görə, əsas məsələlər arasında bunlar var: 1. Rusiya nümayəndə heyətinin iştirakı ilə müharibənin mümkün başa çatması ilə bağlı gələcək üçtərəfli danışıqlara hazırlıq; 2. Ukrayna üçün silahların satın alınması; 3. “Dronlar müqaviləsi” ABŞ ilə Kiyevin dronlardan müdafiə üçün döyüş sınaqlarından keçmiş texnologiyaları Vaşinqtonla paylaşmasını, bunun müqabilində isə Ukraynanın ballistik raketlər və təhlükəsizlik zəmanətləri də daxil olmaqla çatışmayan müdafiə sistemləri əldə etməsini nəzərdə tutur.