Əgər ailədə abort kimi ağır bir günah hökm sürürsə, o zaman, əlbəttə ki, belə bir təməl üzərində heç bir xoşbəxtlik qura bilməzsən, belə bir ailə məhvə məhkumdur, – bu barədə Ümumi Gürcüstanın Katolikos-Patriarxı, Mtsxeta -Tbilisi arxiyepiskopu, Bicvinta və Tsxum-Abxaziya mitropoliti Üçüncü Şio Üçlük məbədində bildirib.

Üçüncü Şio Üçlük məbədinin həyətində toplaşan möminlərlə bir daha ailə haqqında danışıb və ölkədəki demoqrafik vəziyyətin diqqətəlayiq olduğunu qeyd edib.

“Müqəddəs Kitabdan bildiyimiz kimi, öldürülənlərin qanı Rəbbə intiqam üçün fəryad edir; əksinə, hər iki-üç ildən bir uşağın – Tanrı tərəfindən göndərilmiş bu mələyin doğulduğu yerdə isə xoşbəxtlik olur, çünki o, öz varlığı ilə ətrafındakı hər şeyi isidir, işıqlandırır və xeyir-dua bəxş edir. Çoxuşaqlı ailələrdən, valideynlərdən bildiyimiz kimi, başlanğıcda, ilk üç uşağa qədər daha çətindir, sonradan isə çətinliklər xeyli azalır və çoxuşaqlı ailəni idarə etmək daha asan olur. Biz bütün bunlar barədə düşünməsək, demoqrafik vəziyyətimizi düzəltməsək, ailənin möhkəmlənməsi, xilası və qorunub saxlanması qayğısına qala bilməsək, bizi real təhlükə gözləyir, cənnət kimi gözəl və füsunkar ölkəmizdə bizimlə bərabər uşaqları sevən, övladlarından imtina etməyən və öz dinlərini qoruyan başqa xalqlar məskunlaşacaqlar. Belə davam etsək, sayca gürcüləri üstələmələri təhlükəsi realdır. Buna görə də Rəbb bizə lütf bəxş etsin ki, ailənin xilası, ailə dəyərlərinin qorunması üçün çalışaq, əmək verək, fədakarlıq edək; ailəni, xalqımızı zərərli gender nəzəriyyələrindən və ideologiyasından qoruyacaq bir qanunvericiliyə sahib olaq. Bəzilərinin bizə etdiyi çağırışlara baxmayaraq, bu qanunvericilikdən imtina etməməliyik, əksinə, bu istiqaməti gücləndirməli və möhkəmləndirməliyik. Bu, ölkəmizin xilasının, çoxalmasının və Tanrının mərhəmətinin rəhnidir”, – deyə Üçüncü Şio bildirib.

Bu gün Gürcüstanda Ailə Müqəddəsliyi və Valideynlərə Hörmət Günü qeyd olunur.