Türkiyənin daxili işlər naziri İstanbulda baş vermiş partlayışda şübhəli bilinən şəxsin saxlanıldığını açıqlayır

İstanbulun İstiqlal prospektində bombanı yerləşdirən və partlayışı törədən şübhəli saxlanılıb-bu barədə Türkiyənin daxili işlər naziri Süleyman Soylu bəyanat verib.

Türkiyə hökumətinin nümayəndəsi bildirib ki, ilkin qiymətləndirməyə görə, terakt əmri “Kürdüstan Fəhlə Partiyası” və “Xalq Müdafiə Birlikləri” adlı kürd qruplaşmasının qərargahının olduğu Suriyanın şimalındakı Ayn al-Arab şəhərindən verilib. Süleyman Soylu Türkiyənin terrora qarşı qəti və qanuni mübarizəsini davam etdirəcəyini açıqlayıb.

“Təxminən 6 ildir İstanbulda dünənki kimi terror hadisəsi baş verməyib. Təkcə bu il 200-ə yaxın terror hadisəsinin qarşısını aldıq. Millət olaraq, ölkə olaraq itirdiyimiz həyatlarımızın bədəlini ağır ödəyəcəksiniz. Əlbəttə, bilirik ki, coğrafiyamızda böyük bir sınaqla qarşı-qarşıyayıq. Bu aksiyanı həyata keçirənlərin hansı mesaj vermək istədiklərini bilirik. Bu mesajı aldıq. Təbii ki, bu hadisənin səbəbkarlarının müəyyən edilməsi üçün polis rəisimizin, terror idarəsinin rəisinin, kəşfiyyat rəisinin və polis rəisinin koordinasiyası ilə xeyli iş aparılıb. Bizim təxminlərimizə görə, günahkar Afrindən gəlib. Sərhəd daxilindəki dağlarda minlərlə qəhrəmanımız, şəhərlərdə minlərlə qəhrəmanımız terrorun qarşısını almaq üçün mübarizə aparır. Bombanı yerləşdirən şəxs saxlanılıb. Bundan əvvəl daha 21 nəfəri saxlamışıq. Terrorun siması acıdır, lakin nəyin bahasına olursa olsun, biz bu mübarizəni sona qədər davam etdirəcəyik və bu, yəqin ki, bizə qarşı dost kimi görünən, bütün terrorçuları ya öz ölkələrində gizlədən ya da terrorçulara işğal etdikləri və idarə etdikləri ərazilərdə həyat verən və öz senatlarından pul göndərdikləri sözdə müttəfiqlərimizin qeyri-səmimiliyidir” -deyə Türkiyənin daxili işlər naziri bildirib.

Son məlumatlara görə, İstanbulda törədilən terror aktı nəticəsində 8 nəfər həlak olub, 81 nəfər isə yaralanıb. Yaralılardan 50-si artıq xəstəxanadan buraxılıb, 5-i isə reanimasiya şöbəsindədir.