Telavidə güclü yağıntı nəticəsində yaşayış evlərinin və binalarının birinci mərtəbələrini su basıb, elektrik ötürücü xətləri sıradan çıxıb, avtomobillərə ziyan dəyib

Telavidə fəlakət – Güclü yağıntı nəticəsində gecə gec saatlarda Telavisxevi çayı daşıb. Gürcüstanın Birinci Kanalının jurnalistinin hadisə yerindən verdiyi xəbərə görə, güclü sel suları şəhərin aşağı hissəsində yerləşən körpüdən keçə bilməyib, daş və çınqılla dolmuş məcrasından çıxan çay Kavkasioni və Alazani küçələrini su altında qoyub.

Təbii fəlakət nəticəsində yaşayış evlərinin zirzəmiləri, mağazalar, apteklər, eləcə də ətraf ərazidə yerləşən bütün dövlət və kommersiya obyektləri su altında qalıb.

Şəhərin sözügedən hissəsinə elektrik enerjisi, təbii qaz və içməli su verilmir. Sakinlər bildirirlər ki, binalarının zirzəmiləri su altında qalıb, bir neçə avtomobilə ziyan dəyib.

Səhər saatlarından etibarən bütün müvafiq xidmətlər və xüsusi texnika səfərbər olunub. Təmizlik işlərinə başlanılıb.

Kaxeti qubernatorunun məlumatına görə, təbii fəlakətin vurduğu ziyan böyükdür, nəticələrin aradan qaldırılması işlərini əlaqələndirmək üçün fövqəladə qərargah yaradılıb.

“Telavi xəbərləri“ fəlakəti əks etdirən videonu sosial şəbəkədə yayır.