Tbilisidə yolayrıclarında, “Yellow Box” adlanan sarı kvadrat nişanlanma sisteminin tətbiqi planlaşdırılır

Tbilisi meri Kaxa Kaladzenin tapşırığı ilə paytaxtın Nəqliyyat və Şəhərsalma İnkişaf Agentliyi Daxili İşlər Nazirliyi ilə birlikdə şəhərdəki yolayrıclarında yol kvadratları şəbəkəsinin, yəni “Yellow Box” sisteminin tətbiqi ilə bağlı işlərə başlayır.

Kaxa Kaladzenin bu gün bələdiyyə hökumətinin iclasında bildirdiyinə görə, beynəlxalq təcrübədə bu, nəqliyyat axınının yüksək olduğu və hərəkətin yalnız svetoforla tənzimlənməsinin kifayət etmədiyi yolayrıclarında tətbiq olunan sınaqdan keçmiş üsuldur.

“Yəqin ki, sükan arxasında olan hər birimiz belə halların şahidi olmuşuq: yolayrıcında yaşıl işıq yanır, amma irəliləmək mümkün deyil. Buna baxmayaraq, sürücülər yolayrıcına daxil olmağa çalışırlar. Nəticədə digər istiqamətlərdə hərəkət edən avtomobillərin qarşısını kəsir və bütün istiqamətlərdə vəziyyəti daha da çətinləşdirirlər. Belə tıxaclarla demək olar ki, hər gün qarşılaşırıq. Bu isə zəncirvari reaksiyaya səbəb olur və ciddi problemə çevrilir.

Bu məsələ tənzimlənməlidir. Gürcüstanın “Yol hərəkəti haqqında” qanununda da qeyd olunur ki, hətta svetoforda yaşıl işıq yandıqda belə, sürücü yolayrıcına daxil olmamalıdır, əgər orada dayanaraq hərəkətə maneə yaradacağı ehtimal olunursa. Lakin bu qaydanın inzibati baxımdan tətbiqi və icrası çətindir”, – deyə Kaxa Kaladze bildirib.

Onun sözlərinə görə, bu kimi problemlərin həlli yol təhlükəsizliyi baxımından da mühüm əhəmiyyət daşıyır.

“Beynəlxalq təcrübə göstərir ki, yolayrıclarında yol kvadratları şəbəkəsi, yəni “Yellow Box” sistemi çox effektiv işləyir. Bir çox ölkədə avtomobil axınının yüksək olduğu və svetoforla tənzimlənməsinə baxmayaraq, yolayrıcından keçidin problem yaratdığı nəqliyyat qovşaqlarında bu üsuldan istifadə olunur.

Bu tip problemlərin həlli yol təhlükəsizliyi baxımından vacibdir. Buna görə də nəqliyyat və şəhərsalma üzrə agentliyimizə Daxili İşlər Nazirliyi ilə birlikdə bu istiqamətdə işlərə başlamağı tapşırmaq istəyirəm. Düşünürəm ki, bu həll müəyyən mənada sürücülərin hərəkətini asanlaşdırmağa kömək edəcək”, – deyə Kaxa Kaladze bildirib.

Paytaxt meri son illərdə Tbilisidə şəxsi avtomobillərin sayının artmasından da danışıb. O qeyd edib ki, statistikaya əsasən, hazırda pik saatlarda şəhərdə 900 minə yaxın avtomobil hərəkət edir.

“Tbilisidə son illərdə avtomobillərin sayı əhəmiyyətli dərəcədə artıb. Şəhərdə, xüsusilə də ayrı-ayrı rayon və ərazilərdə hərəkət problemli vəziyyətə düşüb və tıxaclarla qarşılaşırıq.

Statistikaya nəzər salsaq, məsələn, 2012-ci ilə qədər şəhərdə təxminən 180 min şəxsi avtomobil hərəkət edirdi. Bu gün isə pik saatlarda onların sayı 900 minə çatır. Bu, çox böyük problemdir və ciddi çağırışdır”, – deyə Kaxa Kaladze bildirib.

Onun sözlərinə görə, nəqliyyatın yükünü azaltmaq istiqamətində artıq bir sıra tədbirlər həyata keçirilir. Bunlar arasında “ağıllı” svetoforların tətbiqi, konkret problemli ərazilərin nizamlanması, eləcə də yol kvadratları şəbəkəsinin yaradılması və digər tədbirlər yer alır.