Slovakiyanın enerji operatorunun məlumatına görə, “Qazprom” aprel ayından etibarən Slovakiyaya təbii qaz tədarükünü əhəmiyyətli dərəcədə artıracaq

“Qazprom” aprel ayından etibarən “Türk axını” vasitəsi ilə Slovakiyaya təbii qaz tədarükünü əhəmiyyətli dərəcədə artıracaq. “Deutsche Welle”nin məlumatına görə, bu barədə Slovakiyanın enerji operatoru “Slovensky Plynarensky Priemysel” xəbər verir.

“Qazprom” Slovakiya üçün qaz tədarükünü fevralın əvvəlində bərpa edib və apreldən etibarən həcm bir neçə dəfə artacaq. Lakin Slovakiyanın enerji şirkətində konkret hansı həcmdən danışdıqlarını dəqiqləşdirməyirlər.

Qeyd etmək lazımdır ki, Rusiya qazının Ukraynadan tranzitinin kəsilməsindən sonra Rusiya qazının Slovakiyaya tədarükü Macarıstan üzərindən başlayıb, bu da öz növbəsində məhz “Türk axını” ilə təbii qazı alır.