ABŞ prezidenti Donald Tramp Rusiyanın prezidenti Vladimir Putinlə Romada görüşmək imkanını İtaliya baş naziri Corcia Meloni ilə müzakirə edib. Bu barədə “Sky News” yazır.

“Sky News”in mənbələrinin bildirdiyinə görə, Tramp bu mövzuda Meloni ilə 7 avqustda danışıb.

Teleşirkətin mənbələrinin məlumatına görə, ABŞ və Rusiya liderləri Romada görüş barədə razılığa gəlsələr, böyük ehtimalla, Vatikanda baş tutacaq.

İtaliya Xarici İşlər Nazirliyinin jurnalistlərə bildirdiyinə görə, İtaliyanın xarici işlər naziri Antonio Taiani hesab edir ki, “Rusiya və Ukrayna arasında həqiqi diplomatik dialoqun harada və necə baş verməsindən asılı olmayaraq, İtaliya bu prosesi səmimi və konstruktiv dəstəkləməyə hazır olacaq”.

Bununla yanaşı, “Sky News”un qeyd etdiyi kimi, əgər Tramp və Putin görüşünün yeri kimi İtaliya və ya Vatikan seçilərsə, o zaman Putinin həbs olunması barədə Cinayət Ədaləti Beynəlxalq Məhkəməsinin qərarının yerinə yetirilməsi şübhə altına alınacaq.

Roma Statutunu imzalayan İtaliya Putinin ölkəyə səfər edəcəyi təqdirdə bunu etməyə məcbur olacaq.

Ağ Ev həmçinin bildirib ki, Birləşmiş Ərəb Əmirlikləri, Macarıstan, İsveçrə və Roma Putinin və Trampın görüşünün keçirilə biləcəyi yerlər kimi nəzərdən keçirilir.