Si Dzinpin və Fridrix Merts ikitərəfli əlaqələrdən danışdılar – “Çin strateji tərəfdaşlıqda yeni səhifə açmaq üçün Almaniya ilə əməkdaşlığa hazırdır”

Çin prezidenti Si Dzinpin ilə Almaniya kansleri Fridrix Merts arasında telefon danışığı olub.

Medianın məlumatına görə, onlar ikitərəfli münasibətlərin əhəmiyyəti barədə danışıblar.

“Çin Almaniya ilə hərtərəfli strateji tərəfdaşlıqda Çin-Aİ əlaqələrinin inkişafına kömək edəcək və qlobal iqtisadiyyatın sabit artımına töhfə verəcək yeni səhifə açmaq üçün işləməyə hazırdır”, – Si Dzinpin bildirib.

Bununla yanaşı, Fridrix Mertsin mətbuat katibinin bildirdiyinə görə, hər iki lider qlobal çağırışların öhdəsindən gəlmək üçün əməkdaşlığa hazır olduqlarını vurğulayıblar.

“Kansler ədalətli rəqabətin və qarşılıqlı əlaqələrin vacibliyini vurğulayıb”, – Mertsin sözçüsü qeyd edib.

Rəsmi məlumatlara görə, ötən il Çin-Almaniya ticarət həcmi təxminən 246 milyard avro təşkil edib.