Sərhəd polisi Gürcüstanın dövlət sərhədinin qrup halında qanunsuz keçilməsi faktı üzrə iki xarici ölkə vətəndaşını saxlayıb

Daxili İşlər Nazirliyinin Sərhəd Polisinin əməkdaşları, Batumi Şöbəsinin “Sarpi” sərhəd sektorunun mühafizə olunan hissəsində, iki xarici ölkə vətəndaşı – 1990-cı il təvəllüdlü M.S. və 1999-cu il təvəllüdlü M.E.-ni Gürcüstanın dövlət sərhədini qrup halında qanunsuz keçməsi faktı üzrə saxlayıblar.

İstintaqla müəyyən edilib ki, təqsirləndirilən şəxslər, Türkiyə Respublikasından Gürcüstana doğru, qrup halında sərhəd-keçid məntəqəsini yan keçərək Gürcüstanın dövlət sərhədini qanunsuz olaraq keçiblər.

İstintaq Gürcüstan Cinayət Məcəlləsinin 344-cü maddəsinin ikinci hissəsinin “a” yarımbəndi ilə aparılır, bu da 5 ilədək müddətə azadlıqdan məhrumetməni nəzərdə tutur.