Gürcüstan parlamentinin sədri Şalva Papuaşvili İordaniya Haşimilər Krallığı Senatının prezidenti Faysal Akif əl-Fayezlə görüşüb.

Tərəflər iki ölkə arasında möhkəm dostluq və ikitərəfli əməkdaşlığı müzakirə ediblər.

Şalva Papuaşvili, İordaniyanın qərarına görə minnətdarlığını ifadə etdi. Qərara əsasən, Gürcüstana İsa Məsihin vəftiz olunduğu yerin yaxınlığında torpaq sahəsi verilib və orada Gürcü Mədəniyyət Mərkəzinin tikilməsi planlaşdırılır.

Tərəflər parlamentlərarası əlaqələri gücləndirməyə hazır olduqlarını bildiriblər. Gürcüstan parlamenti nümayəndə heyətinin bu yaxınlarda İordaniyaya səmərəli səfərinin həyata keçirilməsi qeyd olundu.

Senatın prezidenti Gürcüstanın işğal olunmuş bölgələrindəki mövcud vəziyyətlə maraqlanıb və bu barədə Şalva Papuaşvili ətraflı məlumat verib.

Görüşdə Yaxın Şərqdəki mövcud çətin vəziyyət də müzakirə olunub. Tərəflər qeyri-sabit siyasi vəziyyətdə dostluq əlaqələrinin möhkəmləndirilməsinin və regional sülhün və sabitliyin təşviqinin vacibliyini vurğulayıblar.

Görüş hazırda Cenevrədə keçirilən Parlament Sədrlərinin VI Ümumdünya Konfransı çərçivəsində baş tutub. Tədbirdə parlamentin sədri ilə yanaşı, Xarici Əlaqələr Komitəsinin sədri Nikoloz Samxaradze də iştirak edir.

Məlumatı Gürcüstan parlamenti yayır.