Avronestin Gürcüstan əhalisinin iradəsinə məhəl qoymaması və öz mülahizəsinə əsaslanaraq üzv ölkənin seçkilərini və demokratik institutlarını ləğv etməsi qətiyyən qəbuledilməzdir, – bu barədə Gürcüstan parlamentinin sədri Şalva Papuaşvilinin bəyanatında qeyd olunub.

Bəyanatda qeyd olunduğu kimi, Avropa Parlamentinin qüvvələri tərəfindən nümayiş etdirilən düşməncəsinə yanaşmaları nəzərə alaraq, Gürcüstanın daimi parlament nümayəndə heyəti Avronestin növbəti sessiyalarında iştirak etməyəcək.

“İctimaiyyətə məlumdur ki, Gürcüstan Parlamentinin daimi nümayəndə heyətinin iştirak etmədiyi Avronestin Parlament Assambleyası bir neçə qətnamə qəbul edib. Ənənəvi olaraq, bu sənədlərdə Şərq Tərəfdaşlığı təşəbbüsünün gələcək inkişafı, eləcə də onun üzv dövlətləri arasında dialoqun və tərəfdaşlığın təşviqi ilə bağlı baxışlar əks olunmalı idi.

Gürcüstana qarşı düşməncəsinə, ədalətsiz və siyasi baxımdan qərəzli mövqeləri ilə tanınan bəzi Avropalı parlamentari qətnamə mətnlərinə elə əlavələr edib ki, bu, gürcü cəmiyyəti üçün tamamilə qəbuledilməz və hiddət doğurandır. Onların arasında qətnamələrdən biri 2024-cü ilin parlament seçkilərindən “saxtalaşdırılmış”, xalq tərəfindən seçilmiş hakimiyyətdən isə “özünü elan etmiş” olaraq bəhs edir. Həmçinin, polis əməkdaşlarına və dövlət institutlarına hücum edən, barələrində məhkəmənin məhkumedici hökmləri çıxarılmış şəxsləri “siyasi məhbuslar” adlandırır, bununla da qanunun aliliyinin standartlarını tamamilə gözardı edir.

Müvafiq olaraq, bu qüvvələrin Avropa Parlamentində düşmənçilik və dar düşüncəli yanaşmalarını nəzərə alaraq, Gürcüstanın Daimi Parlament Nümayəndəliyi Avronest-in gələcək sessiyalarında iştirak etməyəcək”, – bəyanatda qeyd olunub.

Bununla yanaşı, bəyanata əsasən, Papuaşvili Avropa Parlamentini dar düşüncəli siyasi gündəmdən imtina etməyə və qaydalara əsaslanan beynəlxalq nizama hörmət etməyə çağırır.

“Biz bir daha Avropa Parlamentini dar düşüncəli siyasi gündəmdən imtina etməyə və qaydalara əsaslanan beynəlxalq nizama hörmət etməyə çağırırıq. Onun bu günkü anti-demokratik yanaşmaları Avronest Parlament Assambleyasının özünütəcrid və marginallaşmasına aparan birbaşa yoldur.

Gürcüstan həmişə Şərq Tərəfdaşlığı təşəbbüsündə konstruktiv, səmərəli və əhəmiyyətli töhfə verib. Avropa Parlamenti tərəfindən konstruktiv dialoq üçün uyğun şərait yaradıldığı təqdirdə, Gürcüstan parlamenti nümayəndə heyəti Şərq Tərəfdaşlığının həmin parlament platformasında yenidən iştirak etməyə hazır olacaq”, – bəyanatda deyilib.

Avronest Parlament Assambleyası Gürcüstanın da adının qeyd olunduğu qətnamə dərc edib. Qətnamədə qeyd edildiyi kimi, son zamanlar baş vermiş hadisələr demokratik geriləmə göstərir.