Kiyevdə Rusiyanın gecə saatlarında həyata keçirdiyi hücum nəticəsində bir nəfər həlak olub. Xilasedicilər kişinin cəsədini dağıntılar altından tapıblar.

Xilasedicilər həmçinin bildirirlər ki, Ukraynanın paytaxtında ümumilikdə 26 nəfər yaralanıb, onların arasında bir uşaq da var.

Hücumun nəticələrinin aradan qaldırılması hələ də davam edir, o cümlədən yanğının söndürülməsi və dağıntıların təmizlənməsi. Hadisə yerində kinoloqlar, 512 xilasedici, Dövlət Fövqəladə Hallar Xidmətinin 135 ədəd texnikası, o cümlədən yanğınsöndürmə robotu, polis, Ukrayna Qırmızı Xaç cəmiyyətinin könüllüləri və digər şəhər xidmətləri çalışır.

Rusiya 500-dən çox pilotsuz uçuş aparatı və 10-dan çox raketdən istifadə etməklə Ukraynaya növbəti irimiqyaslı hücuma keçib.

Əsas hədəf Kiyev və Kiyev vilayəti olub.

Ukrayna prezidenti Volodimir Zelenskinin bildirdiyinə görə, Rusiya bir daha göstərir ki, müharibə və terrora son qoymaq niyyətində deyil.

Rusiya prezidenti Vladimir Putinin mətbuat katibi Dmitri Peskov bildirib ki, Rusiya diplomatik yollarla məqsədlərinə çata bilmədiyi üçün Ukrayna ilə müharibəni davam etdirəcək.