Volodimir Zelenski Ukrayna ilə Rusiya arasında sülh danışıqlarının növbəti raundunun Azərbaycanda keçirilməsi təşəbbüsü ilə çıxış edib.

Ukrayna prezidentinin sözlərinə görə, Rusiya diplomatiyaya hazır olarsa, Kiyev Azərbaycanda danışıqlara hazır olacaq.

“Ukrayna üçün ən vacib məsələlərdən biri Rusiyanın bu ədalətsiz müharibəni bitirmək üçün güc tapmasıdır. Biz bu prosesdə vasitəçilik edən tərəfdaşlarımızın rolunu yüksək qiymətləndiririk. Biz Azərbaycan Prezidentinə üçtərəfli danışıqlara hazır olduğumuzu bildirmişik”, – deyə Zelenski qeyd edib.

Volodimir Zelenskinin bildirdiyinə görə, onun Azərbaycana səfəri zamanı altı sənəd imzalanıb və bu sənədlərin təfərrüatları daha sonra məlum olacaq.

“Biz əməkdaşlığımızı və birgə istehsalımızı mütləq inkişaf etdirəcəyik. Bunlar ölkələrimizin, xalqlarımızın təhlükəsizliyini və həqiqətən artırmaq istədiyimiz ticarət dövriyyəsini mütləq artıracaq çox vacib sahələrdir”, – Ukrayna prezidenti qeyd edib.

Zelenski müharibə zamanı göstərilən yardıma görə Azərbaycan Prezidenti İlham Əliyevə təşəkkür edib. Zelenskinin sözlərinə görə, müharibə ərzində Ukrayna Azərbaycandan 11 yardım paketi alıb.

“Siz bizim uşaqlarımıza kömək edirsiniz. Bizim uşaqlar cəbhə xəttinə yaxın bölgələrdəndir. Onlar əzab çəkiblər, müharibədən zərər görüblər. Beş yüzdən çox ukraynalı uşaq buradadır və biz bu dəstəyə görə sizə minnətdarıq”, – Ukrayna prezidenti deyib.

Zelenski həmçinin qeyd edib ki, ölkələr təhlükəsizlik sektorunda dərin əməkdaşlıq qura bilərlər və bu məqsədə çatmaq üçün görüləsi çox iş var.

Öz növbəsində, Azərbaycan Prezidenti hərbi-sənaye kompleksinin həm Azərbaycanda, həm də Ukraynada inkişaf etdiyini və birgə istehsal, ümumiyyətlə, sənaye sahəsində birgə istehsal üçün çox yaxşı imkanların olduğunu qeyd edib. Energetika sahəsində əməkdaşlıqdan danışan İlham Əliyev bildirib ki, “SOCAR” şirkəti Ukraynada artıq uzun illərdir uğurla fəaliyyət göstərir və eyni zamanda burada çox yaxşı perspektivlər mövcuddur.