Rus mətbuatının məlumatına görə, Rusiyanın Kabildəki səfirliyi yaxınlığında baş verən partlayış nəticəsində azı on nəfər ölüb, onlardan ikisi səfirliyin əməkdaşıdır

Rusiyanın Kabildəki səfirliyi yaxınlığında törədilən partlayış nəticəsində azı 10 nəfər ölüb, 8 nəfər yaralanıb. Rusiya mətbuatının məlumatına görə, ölənlər arasında diplomatik nümayəndəliyin iki əməkdaşı var. Bu barədə Rusiya KİV-i Rusiya Xarici İşlər Nazirliyinin bəyanatına istinadən məlumat yayır.

“Sentyabrın 5-də Kabil vaxtı ilə saat 10:50-də naməlum yaraqlı Rusiyanın Kabildəki səfirliyinin konsulluq bölməsinin girişində partlayıcı qurğunu işə salıb. Hücum nəticəsində diplomatik nümayəndəliyin iki əməkdaşı həlak olub. Əfqanıstan vətəndaşları da yaralanıb” – deyə qurumun açıqlamasında bildirilir.

Rusiya mətbuatı bildirir ki, partlayış səfirliyin əməkdaşları viza alacaq namizədləri elan etmək üçün binanın yaxınlığında toplaşan insanların yanına gedərkən baş verib.