Riazan vilayətində hərbi zavodda baş vermiş partlayış və yanğın nəticəsində həlak olanların sayı 11-ə yüksəlib, 130 nəfər isə yaralanıb
Rusiyanın Riazan vilayətində hərbi zavodda baş vermiş partlayış və yanğın nəticəsində həlak olanların sayı 11-ə yüksəlib, 130 nəfər isə xəsarət alıb. Bu barədə məlumatı Rusiyanın Fövqəladə Hallar Nazirliyi yayır.
Hadisə yerində axtarış-xilasetmə işləri davam edir. Xilasedicilər dağıntılar altından üç nəfəri sağ çıxarmağa müvəffəq olublar.
Bölgənin qubernatorunun bildirdiyinə görə, 18 avqust Riazan vilayətində matəm günü elan edilib.
15 avqustda barıt istehsal edən “Elastik” zavodunda partlayış baş verib, nəticədə müəssisənin ərazisində güclü yanğın başlayıb. Rusiya Dövlət Reyestrinin məlumatına görə, zavod silah və döyüş sursatı istehsal edir.
2021-ci ilin oktyabrında həmin zavodda baş vermiş partlayış və yanğın nəticəsində 17 nəfər həlak olub.