Qətərin danışıqçılar qrupu İrandadır və müharibəyə son qoymaq üçün İran nümayəndələri ilə görüşlər keçirir, – bu barədə “Reuters” agentliyi məlumat yayır.

Yayılan məlumata görə, Qətər nümayəndə heyəti Tehrana ABŞ ilə razılaşdırılmış şəkildə səfər edib.

“Reuters”in məlumatına görə, Qətər nümayəndə heyətinin məqsədi müharibəyə son qoyacaq və İranla həll olunmamış məsələləri aradan qaldıracaq yekun razılaşmanın əldə olunmasına kömək etməkdir.

İranlı yüksək vəzifəli rəsmi şəxs “Reuters” agentliyinə bildirib ki, ABŞ ilə razılıq əldə olunmayıb, lakin fikir ayrılıqları azalıb. Maneələr arasında İranın uranı zənginləşdirməsi və boğaza nəzarət məsələsi var.

Dohanın yenidən prosesə cəlb olunması, İranın Qətəri yüzlərlə raket və dronla bombalamasından sonra baş verib; həmin hücumların hədəfi mülki infrastruktur və Ras Laffandakı həyati əhəmiyyətli maye təbii qaz (LNG) istehsalı obyekti olub. Bu hücum Qətərin maye təbii qaz (LNG) ixrac gücünün təxminən 17 faizini məhv edib. Ölkə maye təbii qaz istehsalını martın 2-də İranın zərbələrindən sonra artıq dayandırıb.