“Reuters” – Cənubi Koreya Müdafiə Nazirliyinin məlumatına görə, Şimali Koreya Rusiyaya əlavə hərbçilər göndərmək üçün hazırlıqlarını davam etdirir, lakin yaxın gələcəkdə onların göndəriləcəyinə dair hər hansı bir əlamət qeydə alınmayıb

Cənubi Koreya Müdafiə Nazirliyinin məlumatına görə, Şimali Koreya Rusiyaya əlavə hərbçilər göndərmək üçün hazırlıqlarını davam etdirir, lakin yaxın gələcəkdə onların göndəriləcəyinə dair hər hansı bir əlamət qeydə alınmayıb. Bu barədə “Reuters” agentliyi məlumat yayır.

Sözügedən qiymətləndirmə Şimali Koreya lideri Kim Çen İnin bacısı Kim Yo Conqun ötən həftə Ukrayna prezidenti Volodimir Zelenskinin Pxenyanın Rusiyaya kömək etmək üçün daha 50 000-ə yaxın hərbçi göndərməyi planlaşdırdığı barədə bəyanatını təkzib etməsindən sonra verilib.

“Reuters”in məlumatına görə, Cənubi Koreya Müdafiə Nazirliyi parlamentari Yu Yonq-vona göndərdiyi bəyanatda Şimali Koreyanın Rusiyaya qısamənzilli ballistik raketlər də daxil olmaqla, silah sistemləri tədarük etməyə davam etdiyini qeyd edib. Nazirliyin qiymətləndirməsinə əsasən, Şimali Koreya Rusiyaya 15 milyondan çox artilleriya mərmisi ötürüb. Bu miqdar 152 millimetrlik mərmilərin ekvivalentində hesablanıb.

Bəyanatda həmçinin Seulun qiymətləndirməsinə görə, Cənubi Koreya ilə münaqişədə istifadə oluna biləcək ballistik raketlər və raket sistemlərindən bəhs edilir. Nazirliyin məlumatına görə, Şimali Koreya həmçinin ABŞ ərazisindəki Quam adasına qədər çata bilən “Hvasonq-12” ortamənzilli ballistik raketini operativ istifadə üçün hazırlayır. Nazirlikdən bildirilib ki, Şimali Koreyanın qitələrarası ballistik raketləri ABŞ-ın materik hissəsinə çata bilsə də, onların döyüş başlığının atmosferə yenidən daxil olma texnologiyasını tam inkişaf etdirdikləri hələlik təsdiqlənməyib.

Cənubi Koreyanın Müdafiə Kəşfiyyat Agentliyinin qiymətləndirməsinə istinadən Yu Yong-Vonun ofisi bildirib ki, müharibədə istifadə edilən Şimali Koreya raketlərinin dəqiqliyi döyüş meydanından əldə edilən göstəricilərlə yanaşı, Rusiyanın texniki məsləhətləri və komponentlərinin dəstəyi ilə də yaxşılaşdırıla bilər.