Türkiyə olmadan Avropa memarlığı natamamdır, -bu barədə Türkiyə Prezidenti Rəcəb Tayyib Ərdoğan bildirib.

Onun sözlərinə görə, aydındır ki, Türkiyənin layiqli yer tutmadığı Avropa arxitekturası natamam olacaq və böhranların idarə olunmasında zəif nöqtələr ortaya çıxaracaq.

“Avropa İttifaqının Türkiyəyə ehtiyacı, Türkiyənin Avropa İttifaqına ehtiyacından daha çoxdur və bu tələb gələcəkdə daha da artacaq”, – deyə Türkiyə Prezidenti qeyd edib.

Ərdoğan Avropa Günü münasibətilə yaydığı müraciətdə bildirib ki, bu gün simvolik olaraq təkcə Avropa İttifaqını deyil, həm də qitədə sülhə, əməkdaşlığa və qarşılıqlı hörmətə əsaslanan ortaq gələcəyin qurulması məqsədini ifadə edir.

Ərdoğan Avropa İttifaqını Ankara ilə münasibətləri Türkiyənin tam üzvlük perspektivini nəzərə alaraq inkişaf etdirməyə çağırıb.

Türkiyə liderinin sözlərinə görə, birliyin əsasını təşkil edən Avropa İttifaqının prinsipləri bu gün müharibələr, siyasi çağırışlar və iqtisadi çətinliklər də daxil olmaqla bir çox böhranlarla sınaqdan keçirilir ki, bu da Ərdoğanın qiymətləndirməsinə görə, Avropa İttifaqını daha inklüziv və birləşdirici siyasət yürütməyə məcbur edir.

“Avropa İttifaqına namizəd ölkə olaraq Türkiyə bu prosesin vacib və əvəzolunmaz hissəsi olaraq qalır”, -Türkiyə Prezidenti qeyd edib.

Ərdoğanın bildirdiyinə görə, Türkiyə Avropa İttifaqı ilə münasibətlərini tam üzvlük, öhdəliklərin yerinə yetirilməsi və qarşılıqlı faydalı yanaşma əsasında inkişaf etdirmək niyyətindədir və Ankara da Avropa İttifaqından eyni səmimi iradəni gözləyir.