Rəcəb Tayyib Ərdoğan – Avropa İttifaqı gücünü və nüfuzunu itirməsinin qarşısını almaq və ya dəyişdirmək istəyirsə, buna ancaq Türkiyənin tamhüquqlu üzvlüyü ilə nail ola bilər

“Avropa İttifaqı gücünü və nüfuzunu itirməsinin qarşısını almaq və ya dəyişdirmək istəyirsə, buna ancaq Türkiyənin tamhüquqlu üzvlüyü ilə nail ola bilər”, – bu barədə Türkiyə prezidenti Rəcəb Tayyib Ərdoğan Polşanın baş naziri Donald Tusk ilə görüşdən sonra keçirdiyi mətbuat konfransında bildirib.

Ərdoğanın dediyinə görə, Türkiyə və Polşa NATO-nun şərq və cənub cinahlarında yerləşmiş və Avropanın iki ən böyük quru ordusuna komandanlıq edən əsas müttəfiqlərdir.

Türkiyə prezidenti Rusiya-Ukrayna müharibəsinə də diqqət çəkib.

“Ukraynanın ABŞ və Ukrayna arasında danışıqlar apardığı atəşkəs rejimini qəbul etməsi faktını müsbət hesab edirik. Ümid edirik ki, Rusiya da konstruktiv cavab verəcək. Türkiyənin bu savaşla bağlı mövqeyi ilk gündən çox aydındır. Biz istəyirik ki, hər iki qonşu müharibəni ədalətli sülhlə bitirsin. Əgər son hadisələr Rusiya və Ukraynanın danışıqlar masasına qayıtmasına imkan verərsə, biz danışıqlara ev sahibliyi də daxil olmaqla, istənilən töhfəni verməyə hazırıq. Bölgəmiz müharibə, münaqişə və göz yaşları ilə doludur. Ümid edirik ki, bölgəmiz sülh və sabitliyə nail olacaq. Biz bununla bağlı fəaliyyətimizi davam etdirəcəyik”, – Rəcəb Tayyib Ərdoğan bildirib.

Polşanın baş naziri Donald Tusk isə öz növbəsində Türkiyə prezidentindən regional sabitlik üçün məsuliyyəti öz üzərinə götürməsini xahiş etdiyini bildirib.