Qida Təhlükəsizliyi Agentliyi balıq istehsalı müəssisələrini yoxlayır. 200-ə yaxın obyektdə nəzarət aparılıb. Balığın hisə verildiyi müəssisələrdə kritik uyğunsuzluqlar aşkarlanıb — bu barədə Qida Təhlükəsizliyi Agentliyinin açıqlamasında bildirilir.

Açıqlamada qeyd olunur ki, səlahiyyətli şəxslər obyektləri ölkə üzrə yoxlayıblar.

“Sanitar-gigiyenik normaların pozulması, mənşəyi məlum olmayan boyadan istifadə faktları — bunlar Agentliyin inspektorları tərəfindən aşkar edilmiş pozuntuların siyahısındadır. Dövlət nəzarəti çərçivəsində səlahiyyətli şəxslər balıq hisəvermə müəssisələrini, balıq və kürü istehsalı müəssisələrini, balıqçılıq təsərrüfatlarını və balıq satış obyektlərini ölkə üzrə yoxlayıblar. Bu günə qədər 200-ə yaxın obyektdə dövlət nəzarəti aparılıb.

Tbilisidə iki balıq hisəvermə müəssisəsində kritik uyğunsuzluqlar qeydə alınıb. Xüsusilə, yuyulma-dezinfeksiya-dezinseksiya-deratizasiya prosesinin düzgün aparılmaması; hisəvermə kamerasının zədələnmiş tavanı, həmçinin istehlakçıya məhsul barədə məlumatın düzgün təqdim edilməməsi. Buna görə biznes operatorları cərimələnib və kritik uyğunsuzluqlar aradan qaldırılana qədər istehsal prosesi dayandırılıb.

İstehlakçıya qida haqqında məlumatın təqdim edilməsi qaydası, digər tələblərlə yanaşı, qida etiketində istifadə olunan boya və digər əlavələrin adlarının göstərilməsini nəzərdə tutur. Biznes operatoru həmçinin uyğun sertifikat təqdim etməyə borcludur. Əgər etiketdə yuxarıda qeyd olunan bütün məlumatlar göstərilməyibsə, biznes operatoruna belə qidanı satmaq qadağandır və o, məhsulu bazardan geri toplamalıdır. Qida boyasının istifadəsi qanunvericiliklə icazəlidir və qida əlavələri haqqında texniki reqlamentlə tənzimlənir, lakin onun tam adı və mənşəyi etiketdə qeyd olunmalıdır.

Ölkə üzrə 200-ə yaxın obyektdə aparılan dövlət nəzarətinin nəticəsində istehlakçıya qida haqqında məlumatın təqdim edilməsi qaydasının pozulması doqquz biznes operatorunda aşkarlanıb. Digər hallarda, balıq və kürü istehsalı müəssisələrində yalnız qanunvericiliklə müəyyən olunmuş boyalardan istifadə olunur və etiketdə istifadə olunan qida əlavələri barədə məlumat əks olunur,” – deyə Qida Təhlükəsizliyi Agentliyinin açıqlamasında bildirilir.