Parlament çoxluğunun lideri Mamuka Mdinaradzenin bildirdiyinə görə, çoxluğun bugünkü iclasında bir neçə məsələ müzakirə olunub, o cümlədən beynəlxalq müdafiə ilə bağlı qanunvericilik paketi üzrə parlament çoxluğunun yeni təşəbbüsü.

Mdinaradzenin brifinqdə qeyd etdiyi kimi, qanunvericilik dəyişiklikləri layihəsi ilə Gürcüstan ərazisində qalma qaydasını pozan əcnəbilərin cərimələri artırılır və qeyri-qanuni olan əcnəbilərin ölkədən çıxarılması proseduru sadələşdirilir.

“Birinci məsələ elə bir mövzudur ki, bu, son dövrlərdə yayılan görüntülərdən və ya mövcud reallıqdan irəli gələrək, cəmiyyətimizi ciddi şəkildə narahat edir. Biz bu çağırışlara adekvat şəkildə cavab vermək istəyirik və buna görə də Gürcüstan Parlamentinin, parlament çoxluğunun beynəlxalq müdafiə ilə bağlı yeni qanunvericilik təşəbbüsünü təqdim edirik. Bu qanunvericilik paketi aşağıdakıları nəzərdə tutur: Cinayət Məcəlləsinə cəzanın yeni növü əlavə olunur – əcnəbinin Gürcüstandan çıxarılması və müəyyən müddətə Gürcüstana daxil olmasının qadağan edilməsi. Həmçinin, İnzibati Xətalar Məcəlləsinə də inzibati cəzanın yeni növü əlavə olunur – əcnəbinin Gürcüstandan çıxarılması və Gürcüstana daxil olmasının qadağan edilməsi. Gürcüstan ərazisində qalma qaydalarını pozan əcnəbilər üçün cərimələr əhəmiyyətli dərəcədə artırılır və ölkədə qeyri-qanuni yaşayan əcnəbilərin çıxarılma proseduru xeyli sadələşdirilir”, – Mamuka Mdinaradze bildirib.