Polşada sentyabrın 1-dən məktəb və bağçalarda smartfonların istifadəsi qadağan olunacaq

Polşa Prezidenti Karol Navrotski ölkənin məktəbləri və uşaq bağçalarında smartfonlardan istifadəni qadağan edən qanunu imzalayıb. Yeni qaydalar 2026-cı il sentyabrın 1-dən, yeni tədris ilinin başlanması ilə eyni vaxtda qüvvəyə minəcək.

Qanuna əsasən, həm dövlət, həm də özəl məktəblərin şagirdlərinə təhsil müəssisəsinin ərazisində smartfon və analoji funksiyalı cihazlardan istifadə etmək qadağan olunacaq. Məhdudiyyət təkcə dərslərin gedişatına deyil, həmçinin tənəffüslərə və sinifdənxaric fəaliyyətlərə də şamil edilir. Eyni qadağa məktəbəqədər təhsil müəssisələrinə də aiddir.

Qanun bir neçə istisnanı da nəzərdə tutur. Xüsusilə, müəllim cihazı təhsil prosesi çərçivəsində istifadə etməyi planlaşdırırsa, smartfon və ya planşetdən istifadəyə icazə veriləcək. Həmçinin, şagird valideynləri ilə əlaqə saxlamaq zərurəti yarandıqda smartfondan istifadə edə biləcək.

Bundan başqa, istisna hallar sağlamlıq səbəbləri ilə əlaqədar, xüsusi tətbiqlərdən və ya smartfonla idarə olunan cihazlardan istifadə etməli olan məhdud imkanlı və ya xüsusi qayğıya ehtiyacı olan şagirdlərə də şamil ediləcək.

Çexiya hökuməti də oxşar məhdudiyyət tətbiq etməyi düşünür və mövcud plana əsasən, bu məhdudiyyət 2027-ci ilin sentyabr ayından qüvvəyə minməlidir.