Gürcüstan hakimiyyəti tərəfindən qəbul edilmiş “Ailə dəyərləri və yetkinlik yaşına çatmayanların müdafiəsi haqqında” qanun irəliyə doğru atılmış müsbət addımdır”, – bu barədə Gürcüstan Patriarxlığının İctimaiyyətlə Əlaqələr Xidmətinin yaydığı bəyanatda deyilib.

Bəyanatda deyilib ki, dünyanın bir çox ölkəsində olduğu kimi, bu gün Gürcüstanda da ailə dəyərlərinin qorunması mühüm çağırışa çevrilib.

“İllər ərzində həm Gürcüstan Patriarxlığı, həm də əhalinin əksəriyyəti tərəfindən bu məsələyə münasibət bildirilib, onların hər biri artan çağırışlar fonunda ailə dəyərlərinin qorunmasına xidmət edirdi.

Gürcüstan Kilsəsi gənclərimizi ənənəvi ailə strukturlarını sarsıdan ideologiyalardan daim qoruyurdu və qoruyur.

Bir neçə il əvvəl məktəb fənləri üzrə şagirdlər və müəllimlər üçün dərsliklər Gürcüstan Patriarxlığının kəskin və ədalətli tənqidinə səbəb oldu, çünki bu dərsliklərin bəzi mövzularında ailə dəyərlərinin tənəzzülü açıq şəkildə vurğulanırdı. LGBTQI təbliğatını ehtiva edən hissələri tədris resurslarından çıxarmaq uzun və aktiv səy tələb etdi, çünki təhsil dərslikləri fundamental dəyərlərimizə uyğun olmalıdır.

Bununla yanaşı, LGBTQI təbliğatının yayılması çox vaxt cəmiyyətdə əhəmiyyətli sosial parçalanmalar yaradıb və hətta qütbləşməni dərinləşdirməyə çalışanların əlində gərginlik alətinə çevrilib.

Bu tendensiyalardan çıxış edərək, Gürcüstanın hazırkı hakimiyyəti tərəfindən qəbul edilmiş “Ailə dəyərləri və yetkinlik yaşına çatmayanların müdafiəsi haqqında” qanun irəliyə doğru atılmış müsbət addımdır.

Ümid edirik ki, bu qanun cəmiyyətimizin rifahı üçün səmərəli nəticələr verəcək, çünki bu, gürcü millətinin kimliyini müəyyən edən ənənəvi dəyərlərin qorunması üçün mühüm və qətiyyətli addımdır”, – bəyanatda deyilir.

Salome Zurabişvilinin imzalamadığı “Ailə dəyərləri və yetkinlik yaşına çatmayanların müdafiəsi haqqında” qanunu dünən Gürcüstan parlamentinin sədri Şalva Papuaşvili imzalayıb.