Sülh sazişi Ermənistan və Azərbaycan arasında onilliklərdir davam edən münaqişənin bitməsinə yol açacaq, bir-birinin suverenliyinə və ərazi bütövlüyünə tam hörmət prinsiplərinə əsaslanan yeni mərhələ başlayacaq, – bu barədə Ermənistanın baş naziri Nikol Paşinyan Ağ Evdə Azərbaycanla sülh bəyannaməsi imzalanarkən bildirib.

Paşinyanın qiymətləndirməsinə görə, bəyannamənin imzalanması ilə Cənubi Qafqazda sülh, firavanlıq, təhlükəsiz və iqtisadi əməkdaşlıq mərhələsi başlayır.

“Bu gün biz Ermənistan və Azərbaycan münasibətlərində mühüm mərhələyə çatdıq. Keçmişdə olduğundan daha yaxşı bir tarixə əsas qoyuruq. Bu irəliləyiş, prezident Donald Trampın şəxsi iştirakı olmadan mümkün olmazdı. Sülh sazişi ölkələrimiz arasında onilliklərdir davam edən münaqişənin bitməsinə yol açacaq və qarşılıqlı suverenliyə və ərazi bütövlüyünə tam hörmət əsasında yeni bir mərhələ başlayacaq. Bəyannamənin imzalanması ilə Cənubi Qafqazda sülh, rifah, təhlükəsiz və iqtisadi əməkdaşlıq dövrü başlayır.

Xüsusilə əminəm ki, ABŞ-la birlikdə Ermənistan “Beynəlxalq sülh və rifah üçün Tramp marşrutu” layihəsi üzərində işləyəcək ki, bu da bütün region üçün strateji iqtisadi imkanlar açacaq və uzunmüddətli fayda gətirəcək. Bu, infrastruktur sahəsinə investisiyaları təşviq edəcək, regional əlaqəliliyi gücləndirəcək”, – deyə Paşinyan bildirib.

Azərbaycan Prezidenti İlham Əliyev və Ermənistanın Baş naziri Nikol Paşinyan, ABŞ Prezidenti Donald Trampın vasitəçiliyi ilə Ağ Evdə birgə sülh bəyannaməsini imzalayıb. Sənədə əsasən, tərəflər hərbi əməliyyatları daimi olaraq dayandırmaq, ticarət və diplomatik münasibətlər qurmaq, səyahət etmək və bir-birinin suverenliyinə, ərazi bütövlüyünə hörmət etmək öhdəliyini götürürlər.