“Keçmiş və indikilərin” qarşıdurmasına son qoymaq üçün Koçarianın bloku və Karapetianın partiyası parlamentə daxil ola bilməməlidir, – bu barədə Ermənistanın baş naziri Nikol Paşinyan bildirib.

Ermənistan hökumətinin başçısı parlamentdə çıxışı zamanı müxalifəti debatlarda iştirak etdikdən sonra iclası tərk etdiyinə görə tənqid edib.

Paşinyanın bildirdiyinə görə, maaşların qorunub saxlanılması üçün müxalifət tərəfindən bu taktikadan istifadə olunur.

“Beləliklə, bu, “keçmiş–indikilərin” qarşıdurmasının aradan qaldırılmasının zəruriliyini daha da vurğulayır. Artıq aydındır ki, bunun aradan qaldırılması üçün yalnız bir yol və yalnız bir variant mövcuddur. Bunun üçün “Güclü Ermənistan” partiyası və “Ermənistan” bloku 2026-cı il parlament seçkilərində seçki baryerini aşa bilməməlidir. Bu, hər keçən gün getdikcə daha real siyasi məqsədə çevrilir”, – Nikol Paşinyan qeyd edib.

Ermənistan mediasına görə, “keçmiş və indikilərin” debatları, 2018-ci il “Məxməri inqilabı”ndan sonra ölkənin daxili siyasətində formalaşmış və Paşinyan hökuməti ilə ikinci və üçüncü prezidentlər — Robert Koçarian və Serj Sarqsianın administrasiyaları arasındakı kəskin uçurumu əks etdirən bir narrativdir.