Nikol Paşinyan – Çin, ABŞ, İran, Avropa İttifaqı, Gürcüstan, Böyük Britaniya, Fransa, Almaniyanın Ermənistana ehtiyacı var və bizim də bütün bu tərəfdaşlara ehtiyacımız var

Ermənistanın Baş naziri Nikol Paşinyan bildirib ki, əgər Ermənistan Avropa Birliyinə qoşulmaq üçün müraciət edərsə, Avrasiya İqtisadi Birliyi və Avropa Birliyi arasında seçim etmək üçün referendum keçirilə bilər, lakin ölkə hələ də alternativlərin formalaşdırılması prosesindədir.

Onun sözlərinə görə, Rusiya Ermənistanın alternativ seçimi ilə bağlı qərarı bu gün verməsini istəyir.

“Hazırda alternativin formalaşdırılması prosesindəyik. İndi xalqımıza bu sualı verə bilmərik. Bunun üçün Ermənistan ən azı Avropa İttifaqına üzv olmaq üçün müraciət etməli və ya namizəd statusuna malik olmalıdır. O zaman referendum keçirilməsi məntiqli və zəruri olardı”, – deyə Ermənistan Baş naziri izah edib.

Paşinyanın qeyd etdiyi kimi, Ermənistan məhsullarının Rusiya və Avrasiya İqtisadi Birliyi bazarlarına ixracı ilə bağlı problemlər Ermənistanın siyasi və iqtisadi alternativə sahib olmaq qərarına gəlməsi səbəbindən yaranıb.

“Ermənistan Çin, ABŞ, Böyük Britaniya, Fransa və Niderland ilə strateji münasibətlərə dair sənədlər imzalayıb. Keçmişdə Ermənistanın digər tərəfdaşlarla belə bir münasibəti yox idi və ya bunu edə bilmirdi. Problem də elə budur. Mən Rusiyanın hissləri barədə danışa bilmərəm, lakin deyə bilərəm ki, Rusiya problemi məhz bunda görür: münasibətlər ya eksklüziv (müstəsna) olmalıdır, ya da ümumiyyətlə olmamalıdır. Biz bu yanaşmanı bölüşmürük və deyirik ki, münasibətlər eksklüziv ola bilməz, lakin mövcud olmalıdır. Bu, bizim legitim mövqeyimizdir”, – deyə Nikol Paşinyan bildirib.

Bununla yanaşı, Ermənistanın Baş naziri Ermənistanın Rusiyanın yaxşı, yoxsa pis tərəfdaşı olması barədəki fikirlərə diqqət çəkib.

“Ermənistan 2022-ci ildə nə ilə pis tərəfdaş idi ki, “Kollektiv Təhlükəsizlik Müqaviləsi Təşkilatı” (KTMT) öz öhdəliklərini yerinə yetirmədi, Qarabağdakı rus sülhməramlıları öz öhdəliklərinə əməl etmədilər? Ermənistan kimə nə pislik etdi ki, Belarus prezidenti “Ermənistan kimə lazımdır ki?” deyə bildirdi. Suveren bir ölkə haqqında belə bir şeyi necə demək olar? İndi isə biz Ermənistanın kimə lazım olduğunu göstəririk. Ermənistan Çinə, ABŞ-a, İrana, Avropa İttifaqına, Gürcüstana, Böyük Britaniyaya, Fransaya, Almaniyaya lazımdır və bu tərəfdaşların hamısı bizə lazımdır”, – deyə Nikol Paşinyan bildirib.