Nikol Paşinyan, Ermənistanın Avropa İttifaqına üzvlük prosesinə başlamaq imkanını nəzərdən keçirdiyini bildirir
Ermənistanın Baş naziri Nikol Paşinyan, Ermənistanın real olaraq Avropa İttifaqı ilə münasibətlərdə öz gündəmini genişləndirdiyini və mümkün üzvlük məsələsinin artıq siyasi gündəmin bir hissəsinə çevrildiyini bildirib.
“Bu, sadə məsələ deyil, lakin Ermənistanda siyasi gündəmin bir hissəsinə çevrilib, ona görə də bu mövzuya ətraflı və hərtərəfli yanaşmaq lazımdır. Avropa İttifaqındakı tərəfdaşlarımızın iradlarını və məsləhətlərini dinləmək vacib olacaq” – Ermənistan hökumətinin başçısı bildirib.
Paşinyan, Avropa İttifaqı ilə Ermənistan arasında münasibətlərdə dəyişikliklərin nəzərə çarpmasına sevinir.
“Viza rejiminin liberallaşdırılması ilə bağlı danışıqlara başlanılıb, Avropa Sülh Fondu tərəfindən Ermənistan Respublikasına dəstək haqda qərar qəbul edilib, bunu da çox yüksək qiymətləndiririk” – Paşinyan qeyd edib.
Məlumat üçün bildirək ki, sentyabrın 9-da Avropa İttifaqı Ermənistanla viza rejiminin liberallaşdırılması ilə bağlı danışıqlara başlayıb.