Rusiya prezidenti Vladimir Putin Ermənistanın baş naziri Nikol Paşinyanla görüşüb.

Paşinyan Moskvada davam edən Qlobal Atom Enerjisi Forumunda iştirak edib və bu forum çərçivəsində Rusiya prezidenti ilə görüşüb.

Putin və Paşinyan Ermənistanın Atom Elektrik Stansiyasının fəaliyyəti, həmçinin ikitərəfli münasibətlərin müxtəlif aspektlərini müzakirə ediblər.

Görüş zamanı Putin qeyd edib ki, Rusiya ilə Ermənistan arasında münasibətlər “sabit və yaxşı şəkildə inkişaf edir”.

“Ticarət dövriyyəsi demək olar ki, 11 milyard dollar təşkil edir ki, bu da respublikanın xarici ticarətinin 34%-ni təşkil edir. Ermənistanın Rusiya ilə ticarəti bizim statistikamıza görə 11,7 milyard dollar təşkil edir ki, bu da rekord səviyyədə yüksək göstəricidir. Münasibətlər digər bütün sahələrdə də inkişaf edir”, – Putin bildirib və qeyd edib ki, Ermənistanla həmişə müzakirə olunacaq çox şey var.

Paşinyan isə öz növbəsində foruma dəvətə görə təşəkkür edib və qeyd edib ki, Ermənistanla Rusiya arasında “münasibətlər sabit şəkildə inkişaf edir”.

“Bu il cüzi azalma müşahidə olunur və bu, müəyyən qlobal proseslərlə bağlıdır, lakin mən inanıram ki, bu məsələ ilə bağlı müvafiq iş aparılmalıdır ki, ikitərəfli ticarətimiz 2023–2024-cü illərdə planlaşdırdığımız templə artmağa davam etsin”, – Paşinyan qeyd edib.