Nikol Paşinyan – Ermənistan-Azərbaycan sülh sazişi layihəsi razılaşdırılıb və imzalanmağı gözləyir

Ermənistan-Azərbaycan sülh sazişinin layihəsi razılaşdırılıb və imzalanmağı gözləyir, – bu barədə Ermənistanın baş naziri Nikol Paşinyan X sosial şəbəkəsində yazıb.

Ermənistanın baş nazirinin məlumatına görə, o, ölkənin Müdafiə Nazirliyinə atəşkəs rejiminə riayət etməyi tapşırıb.

“Ermənistan-Azərbaycan sülh sazişinin layihəsi razılaşdırılıb və imzalanmağı gözləyir. Mənim Ermənistan Müdafiə Nazirliyinə göstərişim aydındır: atəşkəs rejimini pozmayın. Ermənistan müharibəyə deyil, sülhə doğru gedir”, – Ermənistanın baş naziri yazır və razılaşdırılmış layihəni imzalamağa hazır olduğunu qeyd edir.

Qeyd etmək lazımdır ki, Azərbaycan Müdafiə Nazirliyi bu gün Ermənistan silahlı qüvvələrinin Azərbaycan ordusunun mövqelərini atəşə tutduğunu açıqlayıb. Ermənistan Müdafiə Nazirliyi qeyd olunan məlumatı təkzib edir.