Ermənistan və Gürcüstan arasında bütün sahələrdə hərtərəfli əməkdaşlığı genişləndirməyə nail olduq. Bu ilin yanvarında ölkələrimiz arasında əməkdaşlığın daha yüksək, strateji tərəfdaşlıq səviyyəsinə yüksəlməsi bunun ən yaxşı göstəricisidir – bu haqda Ermənistanın Baş naziri Nikol Paşinyan Gürcüstanın Baş naziri İrakli Kobaxidze ilə birgə keçirilən brifinqdə bildirib.

“Dost Gürcüstana bir daha gəldiyim üçün şadam. Ənənəvi səmimi qəbula və qonaqpərvərliyə görə çox minnətdaram. Münasibətlərimizdə biz ölkələrimiz arasında bütün sahələrdə hərtərəfli əməkdaşlığı genişləndirməyə nail olduq. Bu ilin yanvarında ölkələrimiz arasında əməkdaşlığın daha yüksək, strateji tərəfdaşlıq səviyyəsinə yüksəlməsi bunun ən yaxşı göstəricisidir. Biz qarşılıqlı maraqlara, eləcə də ölkələrimizin qardaş xalqları tərəfindən qəbul edilən prinsiplərə və demokratik dəyərlərə əsaslanan səmərəli və dövri təmasların həyat qabiliyyətli mexanizmini yaratmağa nail olduq” – Paşinyan qeyd edib.

Bununla yanaşı, Paşinyan bildirib ki, Gürcüstan və Ermənistanın hər bir ölkənin ərazi bütövlüyünü və suverenliyini qeydsiz-şərtsiz tanıması onun üçün mühüm amillərdən biridir.

“Mən bu faktı Cənubi Qafqazda sabitliyə və uzunmüddətli, davamlı sülhə nail olmaq üçün mühüm amillərdən biri hesab edirəm. Regionda ölkələr arasında münasibətlər qarşılıqlı hörmətə, ümumi maraqlara, inkişafa yönəlmiş sağlam iqtisadi rəqabətə əsaslanmalıdır” – Ermənistanın Baş naziri bildirib.

Nikol Paşinyan, İrakli Kobaxidze ilə təkbətək görüşdə uzunmüddətli sülhün əldə edilməsi və regionda sabitliyin güclənməsi ilə bağlı bir sıra məsələlər haqqında danışdıqlarını bildirib.

“Qeyd etməliyəm ki, Azərbaycanla çətin danışıqlar zamanı biz delimitasiya və demarkasiya prosesində müəyyən irəliləyişə nail ola bildik. Ermənistan və Azərbaycan delimitasiya prosesi çərçivəsində fəaliyyət göstərməli olan və 1991-ci ilin Almatı Bəyannaməsinin müddəalarına əsaslanan saziş imzalayıblar. Bu o deməkdir ki, keçmiş sovet respublikaları arasında inzibati sərhədlərin müəyyən edilməsi bu prosesin əsasını təşkil edəcək. Biz yaxın gələcəkdə Ermənistan-Gürcüstan sərhədinin delimitasiyası prosesi çərçivəsində əməli irəliləyiş əldə etməyi gözləyirik.

Təxminən iki illik danışıqlar nəticəsində Ermənistan və Azərbaycan sülh və ölkələr arasında münasibətlərin qurulması sazişinin 80 faizini razılaşdıra bilirlər. Biz Azərbaycana artıq razılaşdırılmış müddəaları imzalamağı təklif etmişik. Həmçinin, diplomatik münasibətlərin qurulması və qarşılıqlı maraq doğuran bütün digər mühüm məsələlərin həlli təklif olunub. Regionun sabitliyi və iqtisadi inkişafı bütün iqtisadi infrastrukturun, kommunikasiyaların açılması və tam işləməsi vacibdir. Biz bu mövzunu hökumətimizin prioriteti hesab edirik. Bu məsələ ilə bağlı ideyamız ən yaxşı şəkildə Ermənistan hökuməti tərəfindən yaradılmış və ilk növbədə, konfrans zamanı Tbilisidə beynəlxalq tərəfdaşlarımızla paylaşdığımız “Sülh yollarının kəsişməsi” layihəsində öz əksini tapıb.

Hörmətli Baş nazir, mən həqiqətən inanıram ki, bizim Cənubi Qafqazda münaqişələr fəslini bağlamaq və regionumuzda davamlı sülh yaratmaq üçün tarixi imkanımız var. Həmçinin, əminəm ki, bu sülhdən faydalananlar təkcə Ermənistan və Azərbaycan deyil, həm də bərabər şəkildə faydalanacaq olanlar Gürcüstan, Türkiyə və İrandır. Ona görə də bütün çətinliklərə baxmayaraq, hökumətimiz regionda sülhün mümkün olması üçün davamlı və yorulmadan bütün səylərini həyata keçirməyə davam edəcək. Biz Gürcüstan hökumətinin regional, beynəlxalq sabitlik və sülhün əldə edilməsinə töhfə vermək səyini yüksək qiymətləndiririk” – Nikol Paşinyan bildirib.

Ermənistanın Baş naziri Nikol Paşinyan Gürcüstana bu gün səfər edib. Ermənistanın Baş nazirinin Hökumət Administrasiyasında rəsmi qarşılanma mərasimi keçirilib. Gürcüstanın Baş naziri İrakli Kobaxidze Nikol Paşinyanı qəbul edib.