Nümayəndə heyətimizin səfəri ABŞ-ın Tayvanın aktiv demokratiyasına yönəlik sarsılmaz sadiqliyinə hörmətlə yanaşır-bu barədə bir az bundan əvvəl Tayvana səfər edən ABŞ Nümayəndələr Palatasının spikeri Nensi Pelosi bildirib.

“Tayvan rəhbərliyi ilə müzakirələrimiz tərəfdaşımıza dəstəyimizi bir daha təsdiqləyəcək və azad və açıq Hind-Sakit Okean regionunu inkişaf etdirmək də daxil olmaqla, ortaq maraqlarımıza xidmət edəcək. Amerikanın Tayvanın 23 milyon əhalisi ilə həmrəyliyi bu gün həmişəkindən daha vacibdir, çünki dünya avtokratiya və demokratiya arasında seçim qarşısındadır”-deyə Pelosi bildirib.

Pekin ABŞ Nümayəndələr Palatasının spikerinin səfərinin ABŞ və Çin arasında gərginliyə səbəb olacağı ilə əlaqədar dəfələrlə Vaşinqtona xəbərdarlıq edib.

Nensi Pelosinin Tayvana səfəri fonunda Çin iki təyyarədaşıyan gəmini dənizə çıxarıb, Fudzian əyalətində isə ballistik raketlər atıb.

Pelosinin səfəri planlaşdırılmamışdı. O, Asiya turu çərçivəsində Tayvana səfər edib.

Pekin Tayvanı öz ərazisi hesab edir, lakin o, əslində nə adaya, nə də Tayvan hökumətinə nəzarət etmir. ABŞ Nümayəndələr Palatasının spikeri Tayvana sonuncu dəfə 1997-ci ildə səfər edib. Nyut Qinqriç o vaxt Çinə səfər etdikdən sonra adaya səfər etmişdi. Pekinin reaksiyası o zaman belə sərt deyildi.