Sentyabrın 4-dən ölkə miqyasında 3051 seçki məntəqəsi açılıb və fəaliyyət göstərir, – bu barədə MSK-nın sözçüsü Natia İoseliani Mərkəzi Seçki Komissiyasında keçirdiyi brifinqdə bildirib.

Onun qeyd etdiyi kimi, seçki administrasiyası 4 oktyabrda keçiriləcək bələdiyyə orqanları seçkilərinə fəal hazırlıqları davam etdirir.

İoselianinin dediyinə görə, Məntəqə seçki komissiyalarının üzvləri artıq seçici vəsiqələrinin və məlumat flayerlərinin paylanmasına başlayıblar.

“Seçici siyahısında dəyişiklik edilməsi ilə bağlı müraciət 16 sentyabr da daxil olmaqla mümkündür. Seçicilərin seçki hüququndan maneəsiz və tam şəkildə istifadə edə bilmələri üçün, seçki administrasiyası bir daha seçicilərə müraciət edərək çağırış edir ki, öz məlumatlarını vaxtında yoxlasınlar və seçki məntəqələrinin harada yerləşdiyini öyrənsinlər.

Seçki Administrasiyası seçicilərə öz məlumatlarını vahid siyahıda yoxlamaq üçün bir sıra xidmətlər təklif edir. Məlumatların yoxlanılması voters.cec.gov.ge veb səhifəsində, sürətli ödəniş terminalları və mobil tətbiq vasitəsilə mümkündür.

Mobil tətbiqin xidmətindən istifadə etmək üçün “Voters Georgia – Cesko” tətbiqini yükləmək, müvafiq sahəyə şəxsi nömrə və soyad daxil etmək lazımdır. Daha sonra siz və ailə üzvləriniz haqqında məlumatlarla tanış ola, xəritə vasitəsilə seçki məntəqəsinin ünvanını görə və 4 oktyabrda harada səs verməli olduğunuzu öyrənə bilərsiniz.

Qeyd etmək lazımdır ki, etnik azlıqların kompakt şəkildə yaşadığı bölgələrdə yaşayan seçicilər öz məlumatlarını Mərkəzi Seçki Komissiyasının veb səhifəsində vahid seçici siyahısından azərbaycan və erməni dillərində yoxlaya bilərlər. Bu isə, öz növbəsində, bərabər imkanların təmin edilməsinin mühüm standartını təşkil edir.