Gürcüstan Milli Bankının Pul Siyasəti Komitəsi 2025-ci ilin iyunun 18-də keçirilən iclasında pul siyasətinin faiz dərəcəsini (yenidən maliyyələşdirmə dərəcəsini) dəyişməz saxlayıb. Pul siyasətinin faiz dərəcəsi 8 faiz təşkil edir.

Gürcüstanda inflyasiya hələ də hədəf, 3 faizlik göstəriciyə yaxın qalır. 2025-ci ilin mayında qiymətlərin ümumi səviyyəsi illik 3.5 faiz artıb, istehlak səbətindən yüksək dəyişkənliyi ilə seçilən qida, enerji daşıyıcıları və siqaret qiymətlərini istisna edən baza inflyasiyası isə bir qədər azalıb və 2.0 faizə bərabər olub.

Uzunmüddətli inflyasiya gözləntiləri sabitdir. Qiymətlərin dəyişikliyi nisbətən sərt olan və uzunmüddətli inflyasiya gözləntilərini əks etdirən xidmət sektorunun inflyasiyası mayda 2.2 faiz təşkil edib. Ümumilikdə, inflyasiyaya artım istiqamətində əsasən ərzağın qiymətləri təsir edir, bu isə müəyyən mənada beynəlxalq ərzaq bazarlarında mövcud tendensiyanın əksidir. Digər tərəfdən, ərzağın artan inflyasiyasını böyük ölçüdə illik azalmış yanacaq qiymətləri hesabına idxal olunan məhsullarda müşahidə edilən deflyasiya balanslaşdırır. Gürcüstan Milli Bankının mərkəzi ssenarisinə əsasən, gözlənildiyi kimi, baza effekti və qlobal olaraq mövcud tendensiyalar nəticəsində 2025-ci ildə inflyasiya müvəqqəti olaraq hədəf göstəricidən yüksək, orta hesabla 3.8 faiz olacaq, orta müddətli dövrdə isə 3 faiz ətrafında sabitləşəcək.

Sabit inflyasiya ilə birlikdə, iqtisadi aktivlik hələ də güclüdür. İlkin göstəricilərə əsasən, ilk dörd ayın orta iqtisadi artımı 8.8 faiz təşkil edib. Gözlənildiyi kimi, iqtisadi artım uzunmüddətli meyil xəttinə yavaş templə yaxınlaşma əlamətləri göstərir. Bununla paralel olaraq, kredit aktivliyinin artım tempi də tarazlı səviyyəsinə daha çox yaxınlaşıb.

Qlobal olaraq cari geosiyasi gərginlik və ticarət məhdudiyyətləri fonunda iqtisadi qeyri-müəyyənlik yüksəkdir. Müvafiq olaraq, inflyasiyaya həm artım, həm də azalma istiqamətində təsir edən risklər hələ də artmış səviyyədə qalır. Bundan irəli gələrək, Pul Siyasəti Komitəsi həm yüksək inflyasiya, həm də aşağı inflyasiya risk ssenarilərini nəzərdən keçirdi. Bir tərəfdən, Yaxın Şərqdə hərbi əməliyyatların nəticəsində neftin qiymətləri artıb. Eyni zamanda, beynəlxalq səviyyədə iqtisadi parçalanma riskləri şiddətlənib. Bu isə, öz növbəsində, təchizat zəncirlərinin pisləşməsi və qlobal inflyasiya mühitinin formalaşması risklərini yaradır. Bu risklərin uzunmüddətli reallaşması fonunda, pul siyasətinin faiz dərəcəsinin mərkəzi ssenariyə nisbətən daha yüksək trayektoriyasını tələb edəcək yüksək inflyasiya ssenarisi inkişaf edə bilər.

Digər tərəfdən, Pul Siyasəti Komitəsi aşağı inflyasiya riskləri ssenarisini nəzərdən keçirdi. Bu ssenarinin reallaşması halında əsas proseslər pul siyasətinin faiz dərəcəsinin mərkəzi ssenariyə nisbətən daha aşağı trayektoriyasını tələb edəcək. Xüsusilə, cari qeyri-müəyyənlik nəticəsində dolların indeksi qlobal olaraq zəifləmiş qalır. Eyni zamanda, son dövrlərdə beynəlxalq ərzaq bazarında xammal məhsullarının qiymətləri müəyyən qədər azalıb. Bu tendensiyaların qorunub saxlanması halında, möhkəmlənmiş məzənnə və beynəlxalq ərzaq qiymətləri idxal olunan məhsulların aşağı inflyasiyası vasitəsilə ümumi inflyasiyanın azalmasına təsir göstərəcək.

Makroiqtisadi təhlil və mövcud risklərin qiymətləndirilməsi nəticəsində Pul Siyasəti Komitəsi dərəcənin sonrakı normallaşdırılması istiqamətində ehtiyatlı yanaşmanı qoruyub saxlamağı və pul siyasətinin faiz dərəcəsini dəyişməz, 8%-də saxlamağı optimal hesab edib. Pul siyasətinin faiz dərəcəsinin sonrakı dəyişikliyi yenilənmiş makroiqtisadi proqnoz ssenariləri və risklərin təhlilindən asılı olacaq.

Gürcüstan Milli Bankı qiymətlərin sabitliyini qorumaq üçün bütün vasitələrdən istifadə edəcək, bu isə orta müddətli dövrdə ümumi qiymət səviyyəsi artımının 3%-ə yaxın olması deməkdir.

Pul Siyasəti Komitəsinin növbəti iclası 30 iyul 2025-ci il tarixində keçiriləcək.

Məlumatı Milli Bank yayır.